Հրատարակությամբ «Ազգ» օրաթերթի օրերս «Տիգրան Մեծ» հրատարակչատան տպարանում լույս տեսավ հայ ազատագրական շարժման մասնակից եւ տարեգիր, Արմենական եւ ապա Ռամկավար Ազատական կուսակցության կարկառուն գործիչ Արտակ Դարբինյանի արժեքավոր հուշագրությունը, որ սկզբնաղբյուրային նշանակություն ունի 1885-1937 թթ. հայ ժողովրդի պատմությունը եւ հատկապես հայկական ազատագրական շարժման ընթացքն ուսումնասիրողների համար։ Գիրքն առաջին անգամ լույս է տեսել 1947 թ. Փարիզում եւ թե՛ Հայաստանում, թե՛ սփյուռքում համարվում է հազվագյուտ։ Գրքի այսՙ 2-րդ հրատարակության մեկենասն է Չիկագոյից (ԱՄՆ) նվիրյալ ազգային, ՌԱԿ Մ. Նահանգների Արեւելյան եւ Կանադայի շրջանային վարչության անդամ Արսեն Դեմիրճյանը, ի հիշատակ իր հորՙ Հաճընի 9-ամսյա ինքնապաշտպանության հերոսներից Ռուբեն Երկաթի։ Խմբագիրն ու առաջաբանի հեղինակն է ՀՀ հասարակական-քաղաքական պատմության արխիվի տնօրեն Ավագ Հարությունյանը։ Գիրքը լաթակազմ է, 389 էջ, լուսանկարների թիվըՙ 83։