ՆՈՅԵՄԲԵՐՅԱՆ, 1 ՀՈԿՏԵՄԲԵՐ, ՆՈՅՅԱՆ ՏԱՊԱՆ։ Սեպտեմբերի լույս 30-ի եւ հոկտեմբերի լույս 1-ի գիշերները Ադրբեջանի Ղազախի շրջանի հենակետերից հրաձգային զենքերով գնդակոծվել է Նոյեմբերյան-Իջեւան ավտոճանապարհի Ոսկեպար-Կիրանց հատվածը։ Տուժածների մասին տեղեկություններ չկան։ Կոթի-Իջեւան երթուղային միկրոավտոբուսի վարորդ Ավետիք Բեջանյանը հայտնեց, որ այդ գնդակոծությունների պատճառով ինքը ստիպված է եղել հոկտեմբերի 1-ի առավոտյան դեպի Իջեւան երթեւեկել Ոսկեպար-Կիրանց շրջանցիկ ավտոճանապարհով, որ կառուցվում է Լինսի հիմնադրամի ֆինանսավորմամբ։
Օրվա ցերեկային ժամերին Ոսկեպար-Կիրանց սահմանամերձ ճանապարհը ադրբեջանական կողմից չի գնդակոծվում, եւ մեքենաների զգալի մասը երթեւեկում է այդ ճանապարհով։