Այս տարի Հայագիտական առաջին համաժողովի ժամանակ հետաքրքրական զեկուցումներից մեկն Իրանի Ազատ իսլամական համալսարանի պրոֆեսորի օգնական Անդրանիկ Սիմոնյանինն էր։ Մեզ հարեւան երկրի մշակույթի հետ միայն վերջին ժամանակներս ենք մենք կարողացել փոքրիշատե լիարժեքորեն շփվել։ Հայ-իրանական մշակութային կապերի ամրապնդման համար այս առումով կարեւոր գործ է անում Անդրանիկ Սիմոնյանը։
1984-89 թթ. Անդրանիկ Սիմոնյանը սովորել է Երեւանի պետական համալսարանում, որն ավարտելուց հետո, 1990-95 թթ. դասավանդել է ԵՊՀ հայոց լեզվի եւ իրանական լեզուների բաժիններում, միաժամանակ ՀՀ ԳԱԱ լեզվաբանության ինստիտուտում Գեւորգ Ջահուկյանի ղեկավարությամբ պատրաստել է գիտական թեզ, որը պաշտպանել է 1995-ի հունիսին (թեման Կենտրոնական Իրանի հայկական բարբառներն էր)։
Նույն ժամանակ վերադառնում է Իրան եւ արժանանում Իրանի կրթության նախարարության «Գնահատման թերթիկի», որը հնարավորություն է տալիս զբաղվելու գիտամանկավարժական գործունեությամբ։
1997 թ.-ից սկսում է աշխատել Ազատ իսլամական համալսարանի հայոց լեզվի եւ գրականության բաժնումՙ դասավանդելով գրաբար, լեզվաբանություն, նոր եւ հին հայ գրականություն, համեմատական քերականություն։
2001 թ. Իրանի նախագահի հրամանով Անդրանիկ Սիմոնյանին շնորհվում է «Ընտիր հետազոտող» կոչումը։ Նույն տարում Թեհրանում անցկացված ժողովրդագրության միջազգային երկրորդ սեմինարին զեկուցում է ներկայացնում Իրանի եւ Կովկասի երկրների ժողովրդագրության վերաբերյալ, որն արժանանում է բարձր գնահատականի։
Դեռեւս Երեւանում սովորելու տարիներին Անդրանիկը համագործակցել է Հայաստանում Իրանի Իսլամական Հանրապետության դեսպանատան հետ, իսկ սկսած 1995-իցՙ գիտական 25 կենտրոնների հետ։
Անդրանիկ Սիմոնյանը գիտամանկավարժական գործունեությանը զուգընթաց մեծ աշխատանք է տանում իրանահայ համայնքումՙ հանդիսանալով Իրանահայերի կրթական եւ ազգային մարմինների հոգաբարձուների խորհրդարանի անդամ։
Ազգանպաստ գործունեություն է ծավալել Անդրանիկ Սիմոնյանը, որը տարեցտարի առավել արդյունավետ է աշխատում։ Հույս ունենք, որ այդ գործունեությունը նոր, ավելի արդյունավետ ձեւեր կընդունի։
Ս. ՄԵԼՔՈՆՅԱՆ