Ինչպես մեզ տեղեկացնում է Երեւանի պետական համալսարանի լրատվական ծառայությունը, Երեւանի եւ Ս. Պետերբուրգի պետական համալսարանների միջեւ խորհրդային կարգերի փլուզումից հետո ընդհատված համագործակցությունը վերստին աշխուժացել է։ Դեռեւս 1999 թ. Պետերբուրգի համալսարանի արեւելյան ֆակուլտետում գործող հայագիտություն կրթական ծրագրի հիման վրա վերականգնվել է «Կովկասագիտություն (հայ-վրացական բանասիրություն)» մասնագիտության բակալավրիատի 4-ամյա ծրագիրը։
Օրերս համալսարանի հյուրն է եղել Պետերբուրգի համալսարանի պատվիրակությունըՙ ռեկտոր Լարիսա Վերբիցկայայի գլխավորությամբ։ Տկն Վերբիցկայան ԵՊՀ գիտխորհրդում հակիրճ ներկայացրել է իր ղեկավարած բուհի կառուցվածքը, խոսել ԱՊՀ եւ այլ երկրների համալսարանների հետ համագործակցության ծրագրերի եւ այլ խնդիրների մասին։
Երկու բուհերի ռեկտորները ստորագրել են համագործակցության համաձայնագիր, որի հիման վրա կմշակվի աշխատանքային ծրագիր։
ԵՊՀ ռեկտոր Ռադիկ Մարտիրոսյանը Լարիսա Վերբիցկայային է հանձնել ԵՊՀ «Ոսկե մեդալ»։