ՀՀ քաղաքաշինության նախարարության եւ ճարտարապետության ազգային թանգարան-ինստիտուտի նախաձեռնությամբ հոկտեմբերի 23-ին բացվեց «Լանդշաֆտը երեխաների աչքերով» վերտառությամբ ցուցահանդեսը։ Ցուցադրանքում տեղ են գտել հանրապետության 5 մարզերի (Լոռի, Գեղարքունիք, Շիրակ, Վայոց ձոր, Երեւան) 13 նկարչական դպրոցների 90 երեխաների ավելի քան 135 նկարչական աշխատանքներ։
Լանդշաֆտը մարդու կողմից ընկալվող տարածք է, որի հատկություններըՙ բնական եւ մարդկային գործոնների ազդեցության, կամ փոխազդեցության արդյունք են։
Ցուցահանդեսը ներկայացնում է հարուստ ու բազմազան մանկական այն աշխարհը, որտեղ ապրում են Հայաստանի Հանրապետության փոքրիկ քաղաքացիները։
Երեւակայության պարզությամբ եւ գրավիչ երանգներով հարուստ նկարչական այս աշխատանքները երեւանյան ցուցադրանքից հետո կտեղափոխվեն Եվրոպա եւ 45 այլ երկրներից բերված համանման աշխատանքների հետ կցուցադրվեն Եվրախորհրդի անդամ երկրների կենտրոնատեղի Ստրասբուրգ քաղաքում։
Ս. ՄԱՐՏԻՐՈՍՅԱՆ