Ֆուտբոլի Եվրոպայի պատանեկան (մինչեւ 17 տարեկաններ) առաջնության ընտրական 7-րդ խմբի մրցաշարում, որ անցկացվում էր Բուլղարիայում, ՀՀ հավաքականը փայլուն ելույթով ավարտեց մրցումները։ Ավարտական տուրում մեր պատանիները խոշորՙ 4-1 հաշվով պարտության մատնեցին Բուլղարիայի հավաքականին։ Արդյունավետ խաղով աչքի ընկավ Էդգար Մանուչարյանըՙ դառնալով խփված բոլոր 4 գոլերի հեղինակը։ Դա հնարավորություն տվեց մեր ընտրանուն խմբում գրավելու առաջին տեղը եւ շարունակելու պայքարը։
Սերբիա-Հոլանդիա մրցախաղում գրանցվեց ոչ-ոքի (1-1)։ Հաջորդ փուլի երկրորդ ուղեգիրը բաժին հասավ սերբ ֆուտբոլիստներին։ Հիշեցնենք, որ մինչ այդ էլ հաջող ելույթներ էին ունեցել մինչեւ 19 տարեկան ՀՀ հավաքականի անդամները։ Այնպես որ, պատանեկան ֆուտբոլում զգալի առաջընթաց է նկատվում, ինչը չափազանց ուրախալի է։ Հաջորդ փուլում մեր թիմի մրցակիցները կլինեն Անգլիայի, Նորվեգիայի եւ Իսլանդիայի ընտրանիները։
| Խ | Հ | Ո | Պ | Գ | Մ | |
| 1. Հայաստան | 3 | 2 | 0 | 1 | 7-3 | 6 |
| 2. Սերբիա | 3 | 1 | 2 | 0 | 5-4 | 5 |
| 3. Հոլանդիա | 3 | 1 | 1 | 1 | 3-3 | 4 |
| 4. Բուլղարիա | 3 | 0 | 1 | 2 | 3-8 | 1 |