Բենլյան տրաստի, Սբ. Սարգիս բարեգործական տրաստի եւ Լոնդոնի ՀԲԸՄ-ի տրաստի հովանավորությամբ Մեծ Բրիտանիայի «Գրանդ Ռոջերս մյուզիքլ արտիստս մենեջմենտ» ընկերությունը հոկտեմբերի 13-ին Լոնդոնի «Ռոյալ ֆեստիվալ հոլում» կազմակերպել է Արամ Խաչատրյանի ծննդյան 100-ամյակին նվիրված համերգ, որի ընթացքում Լոնդոնի ֆիլհարմոնիկ նվագախումբը ելույթ է ունեցել Ջորջ Փեհլիվանյանի ղեկավարությամբ։ Այս մասին հաղորդում է Լոնդոնից Ասատուր Կյուզելյանը, հավելելով, որ ծրագիրը բաղկացած էր սուիտներիցՙ «Գայանե» եւ «Սպարտակ» բալետներից, ինչպես նաեւ հատվածներիցՙ «Դիմակահանդեսից»։ Գերազանցապես հուզիչ երեկո էր հատկապես դահլիճում ներկա հայերի համար, որոնք հիշում էին մեծ երգահանի երկու այցելությունները Լոնդոն, որոնց ընթացքում նա անձամբ ղեկավարել էր իր համերգները «Ռոյալ ֆեստիվալ հոլում» եւ «Ռոյալ Ալբերտ հոլում»։ Դա նաեւ հպարտանքի երեկո էր, քանզի նվագախմբի ղեկավարն ու մենանվագներ կատարողները հայեր էինՙ Լեւոն Չիլինգարյան, Սերգեյ Խաչատրյան, Ալեքսանդր Չաուշյան եւ Ջորջ Փեհլիվանյան։
Ծրագիրը կատարվեց խաչատրյանական շնչի ու ոգու ճիշտ ըմբռնումով եւ բոլորովին զարմանալի չէր, որ հանդիսատեսը բուռն ծափահարություններով ընդունեց կատարողներին։
Խմբավար Ջորջ Փեհլիվանյանը միջազգային ճանաչման արժանացավ 1991-ին, երբ 27 տարեկանում դարձավ առաջին ամերիկացին, որ «Բեսանկոն» խմբավարական հեղինակավոր մրցանակաբաշխության ժամանակ տիրեց Մեծ մրցանակին։ Դրանից հետո ամրապնդելով իր դիրքերըՙ ղեկավարել է աշխարհի խոշորագույն նվագախմբերըՙ Լոնդոնում, Իտալիայում, Ֆրանսիայում, Գերմանիայում, Հոլանդիայում, Կանադայում, Մ. Նահանգներում, Ռուսաստանում, Ավստրալիայում եւ Վիեննայում։
Լեւոն Չիլինգարյանը ծնվել է Կիպրոսում եւ ներկայումս Լոնդոնի երաժշտական արքայական քոլեջի պրոֆեսոր է։ Հիմնել է Չիլինգարյան քառյակը, որը մեծ ճանաչում է ձեռք բերել ամբողջ աշխարհում։ Վերջերս նա դարձել է նաեւ «Կամերատա Ռոման» խմբի երաժշտական տնօրենը եւ 2000 թ. նրան պարգեւատրել է թագուհին։
Ալեքսանդր Չաուշյանը ծնվել է Հայաստանում 1977-ին։ 1990-ին առաջին մրցանակ է շահել Վերոնայիՙ Մոցարտի, իսկ 1992-ինՙ Հոլանդիայի միջազգային երաժշտական մրցանակաբաշխություններում։ Համերգներով հանդես է եկել Մ. Նահանգներում, Ֆրանսիայում, Բելգիայում, Կիպրոսում, Իսպանիայում, Իտալիայում եւ Ճապոնիայում։ Արժանացել է նաեւ բազմաթիվ այլ մրցանակների։
Սերգեյ Խաչատրյանը ծնվել է Երեւանում 1985-ին։ 2000 թ. առաջին մրցանակ է վաստակել Յան Սիբելիուսի (Հելսինկի) միջազգային մրցանակաբաշխությունումՙ դառնալով այդ կազմակերպության պատմության մեջ ամենաերիտասարդ մրցանակակիրը։
Հ. Ծ.