«Վէմ» ռադիոն հրավիրել է աշխարհահռչակ «Հիլիարդ» անսամբլինՙ երկու բացառիկ համերգներով հանդես գալու Հայաստանում, որոնք նվիրված կլինեն Էջմիածնի Մայր տաճարի հիմնադրման 1700 ամյակին։
«Հիլիարդ» անսամբլը (Դեյվիդ Ջեյմս, Ռոջերս Քովեյ-Քրամփ, Սթիվեն Հարոլդ, Գորդոն Ջոնս) մեկն է հնագույն եւ ժամանակակից երաժշտության աշխարհահռչակ վոկալ կամերային երգչախմբերից։ Ինչպես եվրոպական հոգեւոր երաժշտության, այնպես էլ ժամանակակից կոմպոզիտորներիՙ հատուկ «Հիլիարդի» համար գրված գործերի բարձրարվեստ կատարումներով անսամբլը հիացրել է իր ունկնդիրներինՙ իր ոճական եւ կատարողական կատարելության մեջ հասնելով թերեւս անգերազանցելի մի բարձունքի։ http։//www.hilliardensemble.demon.co.uk/
2003 թ. նոյեմբերի 1-ին անսամբլի համերգը տեղի կունենա Երեւանի Ֆիլհարմոնիկ փոքր համերգասրահում։ Էջմիածնի Մայր տաճարում նոյեմբերի 2-ին կայանալիք նրանց համերգը կհեռարձակվի Հայաստանի Հանրային հեռուստատեսությամբ։ Անսամբլը կներկայացնի հայ եւ եվրոպական հոգեւոր երաժշտություն։
Անցած երեք ամիսների ընթացքում «Վէմ» ռադիոն համագործակցել է «Հիլիարդ» անսամբլի հետՙ վերջինիս երգացանկի համար ընտրելով եւ նախապատրաստելով V-XV դդ. հայ հոգեւոր երաժշտության բացառիկ գոհարներ։ Համերգներին զուգահեռ «Հիլիարդ» անսամբլի կատարմամբ Սաղմոսավանքում ձայնագրվելու են շարականներ։ Այս աննախադեպ ծրագրով «Վէմ» Ռադիոն նպատակ ունի հայ հոգեւոր երաժշտության անզուգական գեղեցկությունն ու խորությունը հասցնել միջազգային լայն ճանաչման։
Այս ծրագրի գլխավոր հովանավորն է Թուֆենկյան ընկերությունը www.tufenkian.am։