Գյուտ արք. Նագգաշյանը
Նոյեմբերի 2-ին, Մայր աթոռ Սբ. Էջմիածնի հոբելյանական տարվա հերթական կիրակի օրը, Սբ. Էջմիածինը հյուրընկալել էր փարիզաբնակ հայ ուխտավորներին։ Ն.Ս.Օ.Տ.Տ. Գարեգին Բ Ամենայն հայոց կաթողիկոսի հանդիսապետությամբ ուխտի պատարագ մատուցեց Արեւմտյան Եվրոպայի հայրապետական պատվիրակ եւ Փարիզի առաջնորդ Գերաշնորհ Տ. Գյուտ արք. Նագգաշյանը։
Սբ. պատարագի ընթացքում բոլոր ուխտավորներին եւ հյուրերին ողջունեց Արցախի թեմի առաջնորդ Գերաշնորհ Տ. Պարգեւ արք. Մարտիրոսյանը։ Սրբազան հայրը հանուն Մայր աթոռ Սբ. Էջմիածնի միաբանության եւ հայ հավատացյալների շնորհավորեց Վեհափառ հայրապետին գահակալության չորրորդ տարեդարձի առթիվՙ մաղթելով Նորին Սրբությանը կենաց արեւշատություն եւ գահակալության բեղուն օրեր։ Ապա ուխտավորներին իր պատգամը հղեց Գյուտ Սրբազանըՙ անդրադառնալով Սբ. Էջմիածնի առաքելությանը հայ ժողովրդի կյանքում եւ աղոթելով առ Աստված Միածնաէջ Սբ. աթոռի անսասանության ու հարատեւության համար։
Հավարտ Ս. պատարագի, Գարեգին Բ Ամենայն հայոց կաթողիկոսի օծման չորրորդ տարեդարձի առթիվ կատարվեց հայրապետական մաղթանք։
Սրբազան արարողությանը ներկա էին Գերագույն հոգեւոր խորհրդի անդամներ, թեմակալ առաջնորդներ, միաբան հայրեր, Մայր աթոռի բարերարներ եւ ուխտավորներ Փարիզից։
Մայր աթոռի տեղեկատվական համակարգ