Դեկտեմբերի 9-ից Մոսկվան Վրաստանի Աջարիայի ինքնավարության հետ մտցրեց պարզեցված այցագրային կարգ, ինչը նշանակում է, որ Աջարիայի վարչական տարածքում գրանցված քաղաքացիները կարող են Ռուսաստան մեկնել առանց այցագրի եւ հակառակը։
Վրաստանի արտգործնախարարությունը դատապարտել է Մոսկվայի միակողմանիՙ առանց Թբիլիսիին տեղեկացնելու որոշումը, դա համարելով «երկրի տարածքային ամբողջականության ոտնահարում»։
2000 թ. դեկտեմբերի 5-ից Ռուսաստանի եւ Վրաստանի միջեւ մտցվել է այցագրային կարգ, որը, սակայն, չի տարածվում փաստացի անկախ երկու հանրապետություններիՙ Աբխազիայի եւ Հարավային Օսիայի վրա։ Աջարիան դարձավ երրորդ «ապստամբ» հանրապետությունը, որը Մոսկվայի հետ հաստատում է ուղղակի հարաբերություններՙ շրջանցելով Թբիլիսիին։
Այսօր սպասվում է Վրաստանի ժամանակավոր նախագահ Նինո Բուրջանաձեի այցն Աջարիա, որտեղ նա փորձելու է Ասլան Աբաշիձեին համոզել, որպեսզի վերջինս թույլ տա նախագահական ընտրություններ անցկացնել ինքնավարության տարածքում։