Ավանդաբար Հայաստանի պատվիրակները հաջող մրցելույթներ են ունենում սամբո ըմբշամարտի մրցումներում։ Բացառություն չէր նաեւ մրցաշրջան-2003-ը։ Ռուսաստանի Ուրալսկ քաղաքում անցկացված սամբոյի աշխարհի առաջնությունից չեմպիոնի ոսկե մեդալով տուն վերադարձան Վահան Վարդանյանը եւ Լաերտ Ավագյանը, իսկ Հովհաննես Մալխասյանըՙ արծաթե մեդալով։ Բուլղարիայի Ալբենա քաղաքում կայացած սամբոյի Եվրոպայի առաջնությունում հիանալի հանդես եկան Երվանդ Գրիգորյանը (52 կգ), Հովհաննես Դավթյանը (57 կգ) եւ Լաերտ Ավագյանը (74 կգ), որոնք նվաճեցին աշխարհամասի չեմպիոնի տիտղոսը։ Տարին հաջող էր նաեւ ձյուդոյիստ Արմեն Նազարյանի համար։ 60 կգ քաշային ձյուդոյիստը նախ Երեւանում կայացած Եվրոպայի երիտասարդական առաջնությունում փայլուն մրցելույթներ ունեցավՙ նվաճելով չեմպիոնի տիտղոսը, ապա Դյուսելդորֆում Եվրոպայի մեծահասակների առաջնությունում դարձավ բրոնզե մրցանակակիր։