«ԱԶԳ» ՕՐԱԹԵՐԹ

ՖԻԴԵ-Ի ՑՈՒՑԱԿՈՒՄ ՎԼԱԴԻՄԻՐ ՀԱԿՈԲՅԱՆԸ 19-ՐԴՆ Է

ՖԻԴԵ-ն հրապարակել է շախմատիստների հերթական վարկանիշային ցուցակը հունվարի 1-ի դրությամբ։ Ինչպես եւ նախորդ տարի, այս անգամ էլ աշխարհի լավագույն շախմատիստների ցանկը գլխավորում է ՖԻԴԵ-ի վարկածով աշխարհի 13-րդ չեմպիոն Գարրի Կասպարովը։ Վերջին անգամ ՖԻԴԵ-ն վարկանիշային ցանկը հրապարակել էր 2003 թ. հոկտեմբերի 1-ի դրությամբ։ Կասպարովն իր վարկանիշը բարձրացրել է 1-ով եւ այժմ 2831 միավորով վստահորեն գլխավորում է աշխարհի լավագույն շախմատիստների ցուցակը։ Նա միակ գրոսմայստերն է, որ հատել է 2800-ի սահմանագիծը։ 17 շախմատիստ ունեն 2700 եւ բարձր վարկանիշ։ Սովորաբար, նման վարկանիշ ունեցողներին համարում են էլիտար շախմատիստներ։ Անցյալ տարի առաջին անգամ 2700-ի սահմանագիծը հաջողվել էր հատել նաեւ երեւանցի գրոսմայստեր Վլադիմիր Հակոբյանին (2703), սակայն նրան չհաջողվեց պահպանել բարձր վարկանիշը։ Ներկայում Հակոբյանը 2693 վարկանիշով զբաղեցնում է 19-րդ հորիզոնականը։ Ճիշտ է, հոկտեմբերի հետ համեմատ, Հակոբյանն իր վարկանիշն ավելացրել է 9 կետովՙ 3 հորիզոնականով բարձրանալով վեր։ Հայազգի շախմատիստներից Հակոբյանն այժմ ամենաբարձր վարկանիշն ունի։ Բացի նրանից, 100 լավագույն շախմատիստների թվում ընդգրկվել են եւս 5 շախմատիստներ, որոնցից միայն երեքն են ներկայացնում Հայաստանը։ Հակոբյանից հետո ամենաբարձր վարկանիշն ունի Լեւոն Արոնյանը։ 21-ամյա շախմատիստը, որ ներկայում բնակվում է Գերմանիայում եւ ցուցակում ներկայացնում է այդ երկիրը, 2648 վարկանիշով 45-րդ տեղում է։ Թեեւ նախորդ ցուցակի հետ համեմատ Արոնյանի վարկանիշը մեկով նվազել է, սակայն նա 2 հորիզոնականով վեր է բարձրացել։

Սլովակիան ներկայացնող Սերգեյ Մովսիսյանը պահպանել է իր դիրքը (52-րդ տեղ), թեեւ վարկանիշը 6 կետով նվազել է (2639)։ Ցուցակում 4 հորիզոնականով վեր է բարձրացել Սմբատ Լպուտյանը (58-րդ տեղ), որը նույնքան կետով ավելացրել է իր վարկանիշը (2634)։ Մեր ամենափորձառու գրոսմայստերներից մեկըՙ Ռաֆայել Վահանյանը 2623 գործակցով 74-րդ տեղում էՙ նահանջելով մեկ հորիզոնականով։ Ցուցակում Հայաստանի վերջին ներկայացուցիչըՙ Գաբրիել Սարգսյանը 3 հորիզոնականով վեր է բարձրացել (78-րդ տեղ)ՙ գործակիցն ավելացնելով 4 կետով (2618)։

Ինչպես եւ նախորդ տարի, շախմատիստուհիների վարկանիշային ցուցակը գլխավորում է հունգարուհի Հուդիթ Պոլգարը, որը վաղուց հիմնականում մասնակցում է տղամարդկանց մրցաշարերին։ Ուստի պատահական չէ, որ նա կրում է նաեւ տղամարդկանց գրոսմայստերի բարձրագույն տիտղոսը եւ միաժամանակ տեղ է զբաղեցնում նաեւ 100 լավագույն շախմատիստների ցուցակումՙ 2728 վարկանիշով գրավելով 8-րդ տեղը։ Նրա առավելությունն իր մրցակցուհիների նկատմամբ բացահայտ է։ Բավական է նշել, որ ցուցակում 2-րդ տեղը զբաղեցնող աշխարհի նախկին չեմպիոնուհի չին Սյու Ցզյունը Պոլգարին վարկանիշով զիջում է 164 կետով։ Հայաստանի պատվիրակներից աշխարհի 50 լավագույն շախմատիստուհիների թվում իր պատվավոր տեղն է զբաղեցնում Եվրոպայի չեմպիոնուհի, 2003 թ. հանրապետության լավագույն մարզուհի Էլինա Դանիելյանը։ Նա 2428 վարկանիշով 32-րդ տեղում է։ Հետաքրքրական է, որ անցյալ տարվա ցուցակում Հայաստանը եւս ներկայացված էր մեկ շախմատիստով։ Այն ժամանակ Լիլիթ Մկրտչյանը 2416 գործակցով 38-րդ հորիզոնականն էր զբաղեցնում։ 50 լավագույն շախմատիստուհիների ցուցակում բոլորից շատՙ 10 ներկայացուցիչ ունի Ռուսաստանը։ Չինաստանը ներկայացված է 8 շախմատիստուհով, Ուկրաինան ու Վրաստանըՙ 4-ական։

100 լավագույն շախմատիստների ցանկում եւս Ռուսաստանը մեծ ներկայացուցչություն ունի (16 շախմատիստ)։ Ցավոք, Հայաստանի պատվիրակներից եւ ոչ մեկը տեղ չի գրավել մինչեւ 20 տարեկան պատանիների եւ աղջիկների լավագույն քսանյակում։ Պատանիների ցուցակը գլխավորում է 16-ամյա ադրբեջանցի գրոսմայստեր Թեյմուր Ռաջաբովը, որը 100 լավագույնների ցուցակում 35-րդն է։ Աղջիկների վարկանիշային աղյուսակը գլխավորում է 16-ամյա հնդիկ շախմատիստուհի Խամպի Կոներուն։ Աշխարհի ամենաերիտասարդ գրոսմայստեր Սերգեյ Կարյակինը (հունվարի 12-ին լրացավ նրա 13-ամյակը) ցուցակում 18-րդն է։

Ընթերցողներին ներկայացնում ենք լավագույն տասնյակները։

Տղամարդիկ

Կանայք

Պատանիներ

Աղջիկներ