Ֆուտբոլի Հայաստանի ազգային հավաքականը 8 թիմերի մասնակցությամբ Կիպրոսում անցկացվող մրցաշարով սկսեց նախապատրաստությունը 2006 թ. աշխարհի առաջնության ընտրական մրցաշարի հանդիպումներին։ Երեկ ուշ երեկոյան մեր հավաքականը Պաֆոսում իր անդրանիկ հանդիպումն անցկացրեց ՖԻՖԱ-ի վարկանիշային ցուցակում 74-րդ հորիզոնականը զբաղեցնող Հունգարիայի ազգային ընտրանու հետ։ Հանդիպման ելքը վճռեցին 63¬րդ եւ 75¬րդ րոպեներին Շաբիչի եւ Լիստեշի խփած 2 գոլերը։ Այսպիսով, Հայաստանի հավաքականն անհաջող մեկնարկեց կիպրոսյան մրցաշարում։
Մրցակարգի համաձայն, մեր ֆուտբոլիստներն այսօր ուժերը պետք է չափեն Ղազախստանի ազգային հավաքականի հետ։ Վերջինս մեկնարկային խաղում 1-3 հաշվով զիջեց Եվրոպայի առաջնության մասնակից Լատվիայի ընտրանուն։ Խաղասկիզբը հաջող էր ղազախ ֆուտբոլիստների համար, որոնք 24-րդ րոպեին Յուրի Աքսյոնովի խփած գոլի շնորհիվ հաշվի մեջ առաջ անցան։ Սակայն դա այդ խաղում Ղազախստանի հավաքականի միակ հաջողությունն էր։ Մինչեւ ընդմիջում լատվիացիները 2 անգամ գրավեցին մրցակցի դարպասը։ Աչքի ընկան Մարիան Պախարը եւ Յուրիս Լայզանսը։ Ընդմիջումից հետո վերջինս եւս մեկ անգամ գրավեց մրցակցի դարպասըՙ ամրապնդելով թիմի հաղթանակը (3-1)։
Այսօր Լատվիայի ընտրանին կմրցի հունգարացիների հետ։ Տեղի կունենան նաեւ Կիպրոս-Վրաստան եւ Բելառուս-Ռումինիա հանդիպումները։ Բնականաբար, հայ ֆուտբոլասերներին առաջին հերթին հետաքրքրում է աշխարհի առաջնության ընտրական մրցաշարում Հայաստանի հավաքականի մրցակիցներից մեկիՙ ռումինացիների մրցավեճի արդյունքը Վրաստանի հավաքականի հետ։ Այդ խաղում ռումինացիները հաղթեցին 3-0 հաշվով։ 2 գոլ խփեց Ադրիան Մուտուն, 1 անգամ էլ աչքի ընկավ Ֆլորին Չեռնատը։ Բելառուսի հավաքականը 2-0 հաշվով պարտության մատնեց Կիպրոսի ընտրանուն։
Երեկ ՖԻՖԱ-ի կողմից հավաքականների համար ընկերական հանդիպումների անցկացման հերթական օրն էր։ Տեղի ունեցան մի շարք ընկերական հանդիպումներ։ Տեղեկացնենք ուշ երեկոյան ավարտված 3 հանդիպումների արդյունքները. Էստոնիա-Մոլդովաՙ 1-0, Մակեդոնիա-Բոսնիաՙ 1-0։ Իսրայելի հավաքականը սեփական հարկի տակ ջախջախեց Ադրբեջանի ֆուտբոլիստներին (6-0)։