Երեւանի պետական համալսարանի ռեկտոր դոկտ. Ռադիկ Մարտիրոսյանն իր լոսանջելեսյան այցի շրջանակներում վերջերս հյուրընկալվել է Թեքեյան մշակութային միության Արշակ Տիգրանյան դպրոցում։ Նրան ուղեկցել են ԹՄՄ փոխնախագահ, հասարակական գործիչ Երվանդ Ազատյանը, Գլենդեյլ քոլեջի խորհրդական պրոֆ. Հերմինե Մահսերեջյանն ու Տիգրանյան վարժարանի վարչության անդամ Օշին Քեշիշյանը։ Այցելության ընթացքում հարգարժան ռեկտորն ու Տիգրանյան վարժարանի տնօրեն Վարդգես Գուրույանը տեղեկություններ են փոխանակել իրենց համապատասխան կրթօջախների վերաբերյալ, որից հետո հոգաբարձուների վարչության նախագահ Ջորջ Մանդոսյանը հյուրերին ծանոթացրել է դպրոցում կատարվող շինարարական նոր աշխատանքների հետ։
Այնուհետեւ դոկտ. Մարտիրոսյանը հանդիպել է վարժարանի ավարտական դասարանի ուսանողների հետ, եւ պատասխանել նրանց հուզող հարցերին։ Հաշվի առնելով, որ վարժարանի ուսանողների մեծ մասը Հայաստանից արտագաղթածների զավակներ են, հանդիպումը մեծ հետաքրքրություն է առաջացրել, հաղորդում է «Արմինյն միրոր-սփեքթեյթր» շաբաթաթերթը։