HALO Trust-ը շարունակում է ականազերծման աշխատանքները Ղարաբաղի 5 շրջաններում
3 խաղաղ բնակիչ է զոհվել, եւս 6-ը վիրավորվել մարտի 14-ին Մարտակերտի շրջանի Նոր Կարմիրավան բնակավայրից ոչ հեռու այն պահին, երբ հակատանկային ականի վրա պայթել է «ՈՒԱԶ» մակնիշի քաղաքացիական ավտոմեքենան։ Ստեփանակերտում գործող բրիտանական բարեգործական HALO Trust կազմակերպության գրասենյակից «Ազգը» տեղեկացավ, որ 2004 թ. հունվարից ականների պայթյունը խլել է 7 մարդու կյանք, եւս 9-ը ստացել է տարբեր աստիճանի վնասվածքներ։ 2004 թ. ընթացքում ընդհանուր առմամբ տեղի է ունեցել ականների պայթյունի 5 պատահար։ 2003 թ. գրանցվել է նման 18 դեպք, որի արդյունքում զոհվել է 9, վիրավորվելՙ 12 խաղաղ բնակիչ։
Բրիտանական բարեգործական կազմակերպությունը, որը հիմնվել է 1988 թ., ականազերծման աշխատանքներ է իրականացնում Աֆղանստանում, Աբխազիայում, Անգոլայում, Կամբոջայում, Չեչնիայում, Էլիթրիայում, Մոզամբիկում, Կոսովոյում, Սոմալիում, Շրի Լանկայում եւ Լեռնային Ղարաբաղում։ Ներկայումս HALO Trust-ը ականազերծման աշխատանքներ է տանում ԼՂ Մարտակերտի, Ասկերանի, Մարտունու, Հադրութի եւ Շուշիի շրջաններում։ 2000-2004 թթ. ընթացքում կազմակերպությունը ԼՂ տարածքում իրականացրել է կասկածելի 470 ականապատված տարածքների տեխնիկական հետախուզում։ Ականազերծվել է 148 ականային դաշտեր 600 հա ընդհանուր տարածության վրա, մոտ 5000 հա գյուղատնտեսական եւ արդյունաբերական հողատարածքներ մաքրվել են չպայթած ականներից։ Այս ընթացքում հայտնաբերվել եւ վնասազերծվել է 2300 հակահրետանային, 1000 հակատանկային ականներ, մոտ 28 հազար չպայթած ռազմամթերք եւ գնդիկավոր ռումբեր, ավելի քան 80 հազար միավոր փոքր տրամաչափի ռազմամթերք։
HALO Trust-ի Ստեփանակերտի գրասենյակից տեղեկացանք, որ ականազերծման աշխատանքների ներկայիս տեմպերը շարունակելու դեպքում հնարավոր կլինի 6-7 տարիների ընթացքում Լեռնային Ղարաբաղի տարածքը մաքրել ականներից։ Ներկայումս կազմակերպության շարքերում ներառված են 206 մնայուն աշխատակիցներ Լեռնային Ղարաբաղից, որոնց ամսական միջին աշխատավարձն կազմում է մոտ 200 ԱՄՆ դոլար։
Թ. Հ.