Ֆուտբոլի Հայաստանի մինչեւ 17 տարեկանների պատանեկան հավաքականը անհաջող սկսեց Եվրոպայի առաջնության ընտրական 2-րդ փուլի մրցաշարը։ Ընտրական մրցաշարի 2-րդ խմբում հանդես եկող Հայաստանի ընտրանին մեկնարկային խաղում Շեֆիլդի «Շեֆիլդ ուենդզեյ» մարզադաշտում ուժերը չափեց դաշտի տերերի պատանիների հետ։ Ֆուտբոլի ֆեդերացիայի մամուլի քարտուղարության հաղորդագրության համաձայն, խաղին ներկա է գտնվել մոտ 7 հազար հանդիսական։ Խաղն ավարտվել է անգլիացիների հաղթանակովՙ 2-0։ Հանդիպման 18-րդ րոպեին դաշտի տերերից Մարկ Նոբլը 11 մ հարվածով գրավել է Շահեն Մանվելյանի պաշտպանած դարպասը, իսկ 70-րդ րոպեին Փոլ Շեյնը 2-րդ գնդակն է ուղարկել Հայաստանի հավաքականի դարպասը։ Մեր ֆուտբոլիստները գոլային երեքից ավելի պահ են ունեցել, սակայն չեն կարողացել դրանցից եւ ոչ մեկն օգտագործել։
Հայաստանի հավաքականը հանդես է եկել հետեւյալ կազմով. Շահեն Մանվելյան, Աղվան Հայրապետյան (Արմեն Գեւորգյանց, 75), Մանուկ Մարգարյան, Հարություն Մարգարյան, Վարդան Խաչատրյան, Արթուր Ստեփանյան, Միքայել Սիմոնյան, Նդումբուկ Բալեպ Բա, Ժորա Հովհաննիսյան, Արտակ Օսեյան, Էդգար Մանուչարյան։ 17-րդ րոպեին մեր թիմից զգուշացվել է Հարություն Մարգարյանը։ Հանդիպումը վարել է կիպրոսցի մրցավար Թեոդոտու Կոստասը։
Նույն խմբում հանդես եկող Իսլանդիայի եւ Նորվեգիայի հավաքականների մրցավեճն ավարտվել է իսլանդացիների հաղթանակով (2-1)։ Հաշիվը 35-րդ րոպեին բացել են նորվեգացիները։ Մաթսենը հստակ է իրացրել 11 մ հարվածը։ 47-րդ րոպեին Դրիսգոլը գնդակն ուղարկել է սեփական դարպասըՙ հավասարեցնելով հաշիվը։ Իսլանդացիներին հաղթանակ է պարգեւել 80-րդ րոպեին Սմարասոնի խփած գնդակը։
Այսօր ՀՀ հավաքականը կմրցի նորվեգացիների հետ։ Նշենք, որ եզրափակիչի ուղեգրերը խաղարկվում են ընտրական 7 խմբերում։ Դրանցից մեկի տերն արդեն հայտնի է։ Պորտուգալիայում ընտրական 4-րդ խմբի մրցաշարում Պորտուգալիայի, Հունաստանի, Իսրայելի եւ Ուելսի հավաքականների մրցավեճում հաղթող են ճանաչվել տանտերերը։ Ընդ որում, Պորտուգալիայի եւ Ուելսի հավաքականները վաստակել էին հավասարՙ 6-ական միավոր եւ միայն խփած ու բաց թողած գնդակների լավագույն տարբերությամբ ուղեգիրը բաժին հասավ պորտուգալացիներին։ Ընդ որում անձնական մրցախաղում պորտուգալացիները 0-1 հաշվով զիջել էին Ուելսի պատանիներին։