«Ոսկե խաղակոշիկի» համար պայքարը նոր ուժով է բորբոքվում
Մարզական հրատարակությունների եվրոպական ընկերակցության սահմանած «Ոսկե խաղակոշիկ» մրցանակի համար պայքարում եվրոպական երկրների առաջնությունների հերթական տուրն էական փոփոխություններ մտցրեց։ Բավական ժամանակ լավագույն ռմբարկուների ցուցակը գլխավորող «Բանանցի» նախկին հարձակվող Արա Հակոբյանն առաջատարի իր տեղը զիջեց բրազիլացի ֆուտբոլիստներ Ռոնալդոյին եւ Այլտոնին։ Այն, որ վաղ թե ուշ եվրոպական առաջատար երկրների ռմբարկուներին հաջողվելու էր շրջանցել Արա Հակոբյանին, կասկած չէր հարուցում։ Բարձր արդյունավետության եւ 2 գործակցի շնորհիվ եվրոպական առաջատար երկրների ռմբարկուները «Ոսկե խաղակոշիկի» համար մղվող պայքարում հաղթելու ավելի շատ հնարավորություններ ունեն։ Ռոնալդոն Արա Հակոբյանին կարող էր ավելի վաղ շրջանցել, եթե վնասվածքի պատճառով ստիպված չլիներ առաջնության մի քանի հանդիպում բաց թողնել։ Այդ ընթացքում նրա գլխավոր հակառակորդներից եւ ոչ մեկին չհաջողվեց գերազանցել բրազիլացու ցուցանիշը։ Իսկ խաղադաշտ վերադառնալով, Ռոնալդոն դարձավ 2 գոլի հեղինակ եւ այժմ իր հայրենակցիՙ Բրեմենի «Վերդերի» հարձակվող Այլտոնի հետ գլխավորում է ռմբարկուների ցուցակը։
Վերջին շրջանում կարծես նշանառությունը կորցրել էր Իտալիայի առաջնության լավագույն ռմբարկու Անդրեյ Շեւչենկոն։ Նա բավական ժամանակ խաղադաշտը թողնում էր առանց գոլի։ Բարեբախտաբար, վերջին հանդիպումներում ուկրաինացի հարձակվողը կրկին վերագտել է իր խաղը, աչքի է ընկնում արդյունավետությամբ։ Անկասկած, նա եւս «Ոսկե խաղակոշիկի» գլխավոր հավակնորդներից է։ Լուրջ մրցակից է հանդիսանում նաեւ «Արսենալի» ֆրանսիացի հարձակվող Թյերի Անրին, որը գերազանց մարզավիճակում է եւ հավասարաչափ ելույթներ է ունենում թիմում։ Աստիճանաբար իր լավագույն մարզավիճակն է ձեռք բերում «Ոսկե խաղակոշիկի» նախորդ մրցույթի հաղթող Ռոյ Մաքայը։ Ճիշտ է, նրան դժվար թե հաջողվի կրկնել անցյալ տարվա ցուցանիշը, երբ խփեց 29 գնդակ։ Սակայն վերջին շրջանում Մաքայը կրկին աչքի է ընկնում դիպուկությամբ։
Ընթացիկ մրցաշրջանում էլ բարձր արդյունավետությամբ առանձնանում է «Սելթիկի» շվեդ հարձակվող Հենրիկ Լարսոնը։ Նա արդեն 26 գոլի հեղինակ է, ինչը եվրոպական առաջատար ֆուտբոլային երկրների ռմբարկուների շրջանում լավագույն արդյունքն է։ Սակայն Շոտլանդիայի առաջնության գործակիցը 1,5 է, ուստի «Ոսկե խաղակոշիկին» տիրելու Լարսոնի հնարավորությունները չնչին են։ Ի տարբերություն Լարսոնի, սերբ հարձակվող Մաթեյա Կեժմանն ընթացիկ մրցաշրջանում աչքի չի ընկնում բարձր արդյունավետությամբ։ Ճիշտ է, «Ֆեենոորդի» հարձակվողը 17 գնդակով գլխավորում է Հոլանդիայի առաջնության լավագույն ռմբարկուների ցուցակը, սակայն անցյալ տարվա իր ցուցանիշը (35 գոլ) կրկնել անհնար է։ Ինչ խոսք, մրցանակի հավակնորդներից մեկն էլ Ֆրանսիայի առաջնության լավագույն ռմբարկու Ջիբրիլ Սիսեն է, որն արդեն 20 գոլ է խփել։ Ռմբարկուի հատկանիշներով օժտված Ռուդ վան Նիստելրոյն էլ շարունակում է պայքարը մրցանակի համար։ Այդ պայքարում ամեն ինչ կվճռեն ազգային առաջնությունների ավարտական հանդիպումները։ Իսկ այսօրվա դրությամբ «Ոսկե խաղակոշիկի» հավակնորդների ցուցանիշներն այսպիսին են.
| Ֆուտբոլիստը | Ակումբը | Երկիրը | Գոլ | Գործ. | Միավոր |
| 1. Ռոնալդո | «Ռեալ» | Իսպանիա | 24 | 2 | 48 |
| 2. Այլտոն | «Վերդեր» | Գերմանիա | 24 | 2 | 48 |
| 3. Արա Հակոբյան | «Բանանց» | Հայաստան | 45 | 1 | 45 |
| 4. Թյերի Անրի | «Արսենալ» | Անգլիա | 22 | 2 | 44 |
| 5. Անդրեյ Շեւչենկո | «Միլան» | Իտալիա | 20 | 2 | 40 |
| 6. Ջիբրիլ Սիսե | «Օսեր» | Ֆրանսիա | 20 | 2 | 40 |
| 7. Հենրիկ Լարսոն | «Սելթիկ» | Շոտլանդիա | 26 | 1,5 | 39 |
| 8. Տոր Հենինգ Համրե | «Ֆլորա» | Էստոնիա | 39 | 1 | 39 |
| 9. Ալան Շիրեր | «Նյուքասլ» | Անգլիա | 19 | 2 | 38 |
| 10. Ռոյ Մաքայ | «Բավարիա» | Գերմանիա | 19 | 2 | 38 |
| 11. Վիկտոր Դոբրեցով | «Մետալուրգ» | Լատվիա | 36 | 1 | 36 |
| 12. Ռուդ վան Նիստելրոյ | «Մանչեսթր յուն.» | Անգլիա | 18 | 2 | 36 |
| 13. Լուիս Սահա | «Ֆուլհեմ» | Անգլիա | 18 | 2 | 36 |
| 14. Դիդյեր Դրոգբա | «Մարսել» | Ֆրանսիա | 18 | 2 | 36 |
| 15. Միստա | «Վալենսիա» | Իսպանիա | 17 | 2 | 34 |
| 16. Սալվա | «Մալագա» | Իսպանիա | 17 | 2 | 34 |
| 17. Ռոլանդ Կոլման | ԳԱԿ | Ավստրիա | 22 | 1,5 | 33 |