«ԱԶԳ» ՕՐԱԹԵՐԹ

ՎԻԵՆՆԱՅՈՒՄ ՀԱՅՏՆԱԳՈՐԾՈՒՄ ԵՆ ՓԵԼԵՇՅԱՆԻՆ

Ապրիլի 1¬25-ը Վիեննայի արվեստի սրահը (Kunsthalle Wien) Ուրսուլա Բլիքլե հիմնադրամի հետ համատեղ ներկայացնում է 1938-ին Վանաձորում ծնված հայազգի ֆիլմարար Արտավազդ Փելեշյանին նվիրված մի ցուցադրությունՙ «Մեր դարը» վերնագրով։ Կազմակերպիչների կարծիքով, թեպետ Փելեշյանիՙ ռուսական վավերագրական ֆիլմերից մեծապես ազդված ժապավենները 1980-ականների վերջից արդեն Ժան-Լուկ Գոդարի միջոցով ճանաչում են գտել, այդուհանդերձ Մոսկվայում մեկուսացած արվեստագետի 11 ֆիլմերն արեւմտյան գիտակ հանդիսատեսին անմատչելի են մնացել։ Չնայած նրա աշխատանքները կանոնավորապես ցուցադրվել են կինոփառատոների ժամանակ, իսկ Փելեշյանը 90-ականների կեսից արդեն Արեւմտյան Եվրոպայում է ճանաչում գտել։ Ցուցահանդեսի շրջանակներում «Կերբեր» հրատարակչությունը լույս է ընծայել 432 էջանոց 32,50 եվրո արժողությամբ պատկերագիրքը։ Մուզեումպլաց 1 հասցեում գտնվող սրահը բաց է ամեն օր ժամը 10¬19-ը, հինգշաբթիՙ մինչեւ 22-ը, փակ է չորեքշաբթի։

ԱՆԱՀԻՏ ՀՈՎՍԵՓՅԱՆ, Գերմանիա