Ապրիլի 9-ի ուշ երեկոյան ավազակային հարձակում է տեղի ունեցել «Փյունիկ» թիմի ֆուտբոլիստ, Հայաստանի երիտասարդական եւ ազգային հավաքականներում հանդես եկող կամերունցի Կառլ Լոմբեի վրա։ Մաշտոցի պողոտայում, մոտավորապես ժամը 22-ին, երկու անհայտ անձինք թիկունքից դանակի երկու հարված են հասցրել Կառլ Լոմբեին։ Վերջինիս օգնության են հասել նրա խաղընկերները, որոնք միջադեպի պահին գտնվելիս են եղել դիմացի խանութում։ Լոմբեին չի հաջողվել տեսնել երկու հարձակվողների դեմքերը, քանի որ ամեն ինչ կատարվել է վայրկենապես։ Ինչպես ՀՖՖ մամուլի քարտուղարության հետ հեռախոսազրույցում ասաց Կառլ Լոմբեն, վերջինիս առողջական վիճակը ներկայումս բավարար է։ Այժմ նա ապաքինման ընթացքի մեջ է։