Մամուլի հրապարակումները հայերենով
www.europeanintegration.am ինտերնետային էջում այսուհետեւ ցանկացողները կարող են հայերեն ծանոթանալ եվրոպական մի շարք լրատվամիջոցների հրապարակումներին։ «Հայացք Եվրոպայից. թարմ անդրադարձ եվրոպական լրատվամիջոցներին» ծրագրի շրջանակներում պատրաստված ինտերնետային էջում երեք օրը մեկ ներկայացվում են գերմանալեզու եւ անգլալեզու լրատվամիջոցների նյութերՙ ողջ աշխարհում տեղի ունեցող իրադարձությունների վերաբերյալ։ Օգտվում են մոտ 20 էլեկտրոնային եւ տպագիր մամուլի, 3 ռադիոկայանների եւ մի քանի հեռուստաալիքների նյութերից, իսկ եթե միեւնույն թեմային անդրադառնում են մի քանի լրատվամիջոցներ, մեկ ընդհանուր նյութ են պատրաստում։
«Եվրոպական ինտեգրացիա» հասարակական կազմակերպության այս ծրագիրը սկսվել է մոտ մեկ ամիս առաջ, կավարտվի այս տարվա հուլիսի 20-ին, սակայն ժամանակահատվածի երկարացման, նաեւ իսպանական եւ ֆրանսիական աղբյուրներից նյութեր թարգմանելու համար կազմակերպությունը բանակցություններ է վարում Ֆրիդրիխ Էբերտի հիմնադրամի հետ, որի օժանդակությամբ իրականացվում է այս ծրագիրը։
Ծրագիրը նախատեսված է երիտասարդ մասնագետների եւ քաղաքագետների համար։ «Եվրոպական ինտեգրացիա» հասարակական կազմակերպության նախագահ Կարեն Բեքարյանի հավաստմամբՙ այսօր հանրապետության 6-7 բուհերի միջազգային հարաբերությունների, քաղաքագիտության ֆակուլտետներում ուսանողները հետեւում են էջի նյութերին։ Նա նաեւ ուրախությամբ նշեց, որ պետական մարմինները նույնպես օգտվում են այստեղի նյութերից։
Կազմակերպություններն իրականացնում են մի քանի այլ ծրագրեր եւս։
ԹԱՄԱՐ ՄԻՆԱՍՅԱՆ