ԵՐԵՎԱՆ, 31 ՄԱՅԻՍ, ԱՐՄԵՆՊՐԵՍ։ Թբիլիսիում ամեն տարի մայիսի վերջին կիրակի օրը նշվում է ավանդական սայաթնովյան վարդատոնը, որն առաջին անգամ 1914 թ. գարնանն անցկացրել են անվանի բանաստեղծ Հովհաննես Թումանյանը ու նկարիչ Գեւորգ Բաշինջաղյանը։
Ինչպես հայտնեց Հայաստանի գրողների միության անդամ, արձակագիր, հրապարակախոս Հրաչյա Մաթեւոսյանը, 90 տարի անց, այս մայիսի 30-ին եւս նշվել է վարդատոնը։
Միջոցառումը կազմակերպել են «Վերնատուն» գրական միավորումը եւ Վրաստանի հայերի միությունը, այն անցկացվել է Սբ Գեւորգ եկեղեցու բակում, որտեղ հավաքվել են Սայաթ-Նովային իրենց հարգանքի տուրքը մատուցելու ժամանած հայեր, վրացիներ եւ այլազգի ներկայացուցիչներ։ Տոնի մասնակիցները հանդես են եկել երգ ու պարով, ելույթներով, ՀՀ ժողովրդական արտիստ, դերասանուհի Ժենյա Ավետիսյանը հնչեցրել է Սայաթ-Նովայի բանաստեղծությունները։