«Հայաստան» համահայկական հիմնադրամի Կանադայի վարչութեան ատենապետ ընկեր Գէորգ Մանուկեան իր երկարամեայ ազգային եկեղեցական, մշակութային եւ ընկերային կեանքի ծառայութիւններուն որպէս վարձատրութիւն վերջերս արժանացաւ Ամենայն հայոց կաթողիկոս Գարեգին Բ-ի սրբատառ կոնդակին ու «Ս. Ներսէս Շնորհալի» շքանշանին ձեռամբ Կանադայի հայոց առաջնորդ Բագրատ եպս. Գալստանեանի:
Ընկեր Գ. Մանուկեանի կուսակցանուէր աշխատանքը սկսած է իր վաղ երիտասարդութեան օրերէնՙ Բեյրութէն, երբ մաս կազմած է «Զարթօնք» պաշտօնաթերթի խմբագրական կազմին ընկեր Գերսամ Ահարոնեանի խմբագրապետութեան շրջանին: Մասնակցած է ՌԱԿ-ի կուսակցական կեանքին Լիբանանի, Կիպրոսի, Յունաստանի, Անգլիոյ ու վերջապէս Կանադայի մէջ բերելով իր ամբողջական նուիրումը եւ ներդրումը մեր գաղափարական դպրոցին: Հիմնադիրներէն է եղած Մոնթրէալի ՌԱԿ Բարունակ Թովմասեան ակումբին: Մաս կազմած է ՌԱԿ Մ. Նահանգներու ու Կանադայի շրջանային վարչութեան ու կը շարունակէ աշխատակցիլ ՌԱԿ-ի մամուլին: Ան ունի մօտ 45 տարիներու ազգային քաղաքական ծառայութեան վաստակ մը:
Կանադայի «Հայաստան» համահայկական հիմնադրամի վարչութիւնը գնահատելով ընկեր Գ. Մանուկեանի աշխատանքը, մարտ 29, 2004-ի նիստին վերընտրեց զինք հիմնադրամի ատենապետ ու կազմեց իր դիւանը այսպէս. ընկեր Գէորգ Մանուկեանՙ ատենապետ (Ս. Գրիգոր Լուսաւորիչ առաջնորդանիստ մայր եկեղեցի), Կարպիս Աբոշեանՙ փոխատենապետ (ՀԲԸՄ), ընկեր Աւետիս Սափսզեանՙ ատենադպիր (ԹՄՄ), Զաւէն Ինճեճիկեանՙ փոխատենադպիր (ՀՅԴ Միհրան Փափազեան կոմիտէ), ընկերուհի Անահիտ Տեմիրճեանՙ գանձապահ (ՌԱԿ Է. Բաբազեան-Բ. Թովմասեան ակումբ), Գէորգ Մանկելեանՙ փոխգանձապահ (ՀՅԴ Սարգիս Զէյթլեան կոմիտէ), Մարօ Ֆրունճեանՙ խորհրդական (ՀՕՄ Մոնթրէալի «Սօսէ» մասնաճիւղ), Ֆերդին Չաքմաքեանՙ խորհրդական (Տիրամայր Նարեկի Հայ կաթողիկէ եկեղեցի), Անդրանիկ Օհանեանՙ խորհրդական (Պոլսահայ միութիւն), Վահան Գազանճեանՙ խորհրդական (Նոր սերունդ մշակութային միութիւն) եւ Յակոբ Ամիրեանՙ խորհրդական (Կանադայի հայ աւետարանական խորհուրդ):
ՌԱԿ ՄԱՄԼՈՅ ԿԵԴՐՈՆԱԿԱՆ ԴԻՒԱՆ