ԵՐԵՎԱՆ, 1 ՀՈՒԼԻՍ, ԱՐՄԵՆՊՐԵՍ: Հայաստան-սփյուռք միջոցառումների շրջանակներում հոկտեմբերի 27-29-ը տեղի կունենա Հայագրոֆորում առաջին համահայկական միջազգային համաժողովը, ուր կարծարծվեն գյուղատնտեսության խնդիրները:
ՀՀ արտաքին գործերի նախարարության սփյուռքի վարչության պետ Ջիվան Մովսիսյանի խոսքերով, համաժողովին կմասնակցեն նաեւ սփյուռքի գործարարները, որոնք կիրազեկվեն մեր գյուղատնտեսության զարգացման միտումներին: Ըստ նրա, ՀՀ գյուղատնտեսությանը ծանոթացնելու միջոցով ներդրումների խրախուսման խնդիր է դրված:
Վարչության պետը նաեւ նկատեց, որ համաժողովը կխթանի հայկական գյուղատնտեսական ապրանքների համար նոր շուկաների նվաճման գործընթացին: Համաժողովի շրջանակներում տեղի է ունենալու նաեւ գյուղատնտեսական արտադրանքի ցուցադրություն: