Առաջնության 12-րդ տուրում ուշադրության կենտրոնում «Միկայի» եւ «Արարատի» մրցավեճն էր: Մրցաշարային աղյուսակում հարեւան թիմերի հանդիպումը սպասվում էր մեծ հետաքրքրությամբ: Սակայն սպասված համառ մրցակցությունը չստացվեց: Արարատցիներն այս խաղում իրենց հնարավորություններից շատ ցածր հանդես եկան, որի հետեւանքով «Միկան» համոզիչ հաղթանակ տարավ: «Միկան» դեռեւս առաջին խաղակեսում վճռեց հանդիպման ելքըՙ 3 անգամ գրավելով արարատցիների դարպասը: Խփված գոլերում, ինչ խոսք, իրենց մեղքն ունեին «Արարատի» պաշտպանները, որոնց անփույթ խաղի հետեւանքով գնդակը հայտնվեց ցանցում: Այսպես, 13-րդ րոպեին աջ եզրից Գրիգոր Գրիգորյանի փոխանցումը դիպուկ հարվածով եզրափակեց Դավիթ Գրիգորյանը: 9 րոպե անց պաշտպանների թույլտվությամբ Վարդան Հովհաննիսյանը հանգիստ գլխի հարվածով 2-րդ անգամ գրավեց դարպասը: 33-րդ րոպեին կրկին աչքի ընկավ Դավիթ Գրիգորյանը:
Հասնելով նկատելի առավելության, ընդմիջումից հետո «Միկան» զգալիորեն թուլացրեց ակտիվությունը, որից օգտվելով էլ արարատցիները փորձեցին բեկում մտցնել խաղի մեջ: Սակայն նրանք այդպես էլ չկարողացան օգտագործել ստեղծված մի քանի գոլային պահերը: Եվ միայն հանդիպման վերջին րոպեին Մհեր Ավանեսյանը 11 մ հարվածով «թրջեց» հաշիվը:
Երկրի չեմպիոն «Փյունիկը» խոշոր հաշվով 3-րդ անընդմեջ հաղթանակը տոնեցՙ 3-0 հաշվով պարտության մատնելով «Դինամո-Զենիթին»: 2 անգամ աչքի ընկավ Էդգար Մանուչարյանը, 1 գոլ էլ խփեց Շվեյցարիայում փորձաշրջան անցած Կարեն Ալեքսանյանը:
«Բանանցը» հյուրընկալվելիս 2-1 հաշվով հաղթեց «Կոտայքին»: Հաշիվը 2-րդ րոպեին բացեց Ռոմեն Ջենեբյանը: Մինչեւ ընդմիջում Տիգրան Եսայանը 2-րդ գնդակը խփեց: Երկրորդ խաղակեսում կոտայքցի Վահագն Մինասյանը կրճատեց հաշվի տարբերությունը, սակայն պարտությունից խույս տալ աբովյանցիներին չհաջողվեց:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 11 | 8 | 3 | 0 | 32-10 | 27 |
| 2. Միկա | 12 | 8 | 2 | 2 | 20-13 | 26 |
| 3. Արարատ | 12 | 5 | 4 | 3 | 17-16 | 19 |
| 4. Դ.-Զենիթ | 12 | 4 | 5 | 3 | 13-15 | 17 |
| 5. Բանանց | 11 | 5 | 2 | 4 | 12-13 | 17 |
| 6. Կիլիկիա | 12 | 3 | 2 | 7 | 15-18 | 11 |
| 7. Շիրակ | 12 | 1 | 4 | 7 | 11-21 | 7 |
| 8. Կոտայք | 12 | 1 | 2 | 9 | 11-25 | 5 |
Ռմբարկուները
| Նշան Էրզրումյան | «Կիլիկիա» | 10 |
| Արմեն Շահգելդյան | «Միկա» | 8 |
| Էդգար Մանուչարյան | «Փյունիկ» | 8 |
| Գալուստ Պետրոսյան | «Փյունիկ» | 7 |
| Լեւոն Փաչաջյան | «Փյունիկ» | 6 |