ԵՐԵՎԱՆ, 6 ՀՈՒԼԻՍ, ՆՈՅՅԱՆ ՏԱՊԱՆ: Անցած գիշեր հայ-ադրբեջանական սահմանի Նոյեմբերյանի հատվածում որոշ լարվածություն է առաջացել, սակայն ադրբեջանական կողմից բացված կրակը հաջողվել է կասեցնել: Այս մասին լրագրողներին հայտնել է Հայաստանի զինված ուժերի գլխավոր շտաբի պետ, ՀՀ պաշտպանության նախարարի առաջին տեղակալ գեներալ-գնդապետ Միքայել Հարությունյանը:
Ըստ գեներալ-գնդապետի, սխալ կլիներ ենթադրել, որ ղարաբաղյան հակամարտության գոտում հրադադարի ռեժիմի հաստատումից ի վեր ադրբեջանական բանակը չի փոխվել: Նշելով, որ Ադրբեջանը կատարելագործում է իր զինված ուժերը, Միքայել Հարությունյանը համոզմունք է հայտնել, որ ադրբեջանական կողմը գիտի նաեւ հայկական բանակի մարտունակության մասին: Հակառակ դեպքում, ինչպես ընդգծել է գլխավոր շտաբի պետը, ադրբեջանցիները կրկին պատերազմ կսկսեին: Գեներալը համոզմունք է հայտնել, որ պատերազմ սկսողն այն տանուլ կտա:
Ըստ Միքայել Հարությունյանի, Հայաստանի զինված ուժերը հանդերձված են անհրաժեշտ սպառազինությամբ եւ համալրված են բարձր պրոֆեսիոնալիզմ ունեցող սպայակազմով, որի 90%-ից ավելին ունի բարձրագույն ռազմական կրթություն: