Մոտ 60 երկրներում ներկայացուցչություն ունեցող «Օրիֆլեյմ» ընկերությունն այսուհետեւ կգործի նաեւ Հայաստանում: Ընկերությունն արդեն 7 տարի աշխատում է ռուսաստանյան շուկայում, իր արտադրանքը տարածելով ինչպես անկախ դիստրիբյուտորների, այնպես էլ մեծածախ առեւտրացանցի միջոցով, որոնք հնարավորություն են տալիս հասնելու սպառողների առավելագույն քանակի: Այնտեղ դրանց թիվը հասնում է 110 հազարի:
Հիշեցնենք, որ ընկերությունը ստեղծվել է Շվեդիայում, 1967 թվականին, հիմնադիրներն են Յոնաս եւ Ռոբերտ Յոկնիկները, որոնք իրենց առջեւ նպատակ են դրել ստեղծելու բարձրորակ ու մատչելի կոսմետիկական միջոցներ: Ընկերության գիտաարտադրական համալիրը Իռլանդիայի էկոլոգիապես մաքուր շրջանում էՙ Ուիկլոու Հիլզում: Ընկերությունը երաշխավորում է, որ իր արտադրանքը պատրաստվում է բնական բաղադրիչներից, նորագույն տեխնոլոգիաներով, համապատասխանում է որակի եւ շրջակա միջավայրի անվտանգության պահանջներին:
«Երեւան» հյուրանոցում լրագրողների հետ հանդիպման ժամանակ ընկերության տարածաշրջանային մենեջեր Մաթս Պալկմիթսը եւ Վրաստան -Հայաստան մասնաճյուղի ղեկավար Լեւան Բոկաչավան հայտնեցին, որ ընկերությունը Հայաստանում իրավաբանորեն գրանցվել է անցյալ տարի, այսօր արդեն աշխատում են 5 հազար խորհրդատուներ: «Օրիֆլեյմի» հարուստ տեսականին խանութներում չի վաճառվելու, իրեն հետաքրքրող կոսմետիկական միջոցը պատվիրելուց առաջ գնորդը անպայման պետք է խորհրդակցի ընկերության խորհրդատուի հետ: «Օրիֆլեյմի» կատալոգներ կարելի է ձեռք բերել խանութների կոսմետիկայի բաժիններում:
Ռ.Պ.