«ԱԶԳ» ՕՐԱԹԵՐԹ

ԼԵՎՈՆ ԱՐՈՆՅԱՆԻ ՎԱՐԿԱՆԻՇԸ ԶԳԱԼԻՈՐԵՆ ԱՃԵԼ Է

ՖԻԴԵ-ն հրապարակել է աշխարհի ուժեղագույն շախմատիստների վարկանիշային ցուցակը հուլիսի դրությամբ: 100 շախմատիստների ցանկում տեղ են զբաղեցրել Հայաստանի 5 պատվիրակներ, ինչպես նաեւ Սլովակիայում բնակվող Սերգեյ Մովսիսյանը: Ապրիլ ամսվա համեմատ մեր շախմատիստներից ամենամեծ առաջընթացն ունեցել է Եվրոպայի այս տարվա առաջնության բրոնզե մրցանակակիր Լեւոն Արոնյանը: Նա իր վարկանիշը բարձրացրել է 26 կետով եւ 51-րդ տեղից տեղափոխվել 32-րդ հորիզոնական: Ավելի մեծ առաջընթաց նկատվել է միայն ֆրանսիացի Էտյեն Բաքրոյի (+37) եւ հոլանդացի Լյուկ վան Վելիի (+29) մոտ:

Հայաստանի շախմատիստների առաջատար Վլադիմիր Հակոբյանը 4 հորիզոնականով վեր է բարձրացելՙ զբաղեցնելով 17-րդ տեղը: Նրա վարկանիշն աճել է 3 կետով եւ այժմ 2692 է: 3-ական կետով աճել են Ռաֆայել Վահանյանիՙ 2642 (53-րդ տեղ) եւ Գաբրիել Սարգսյանիՙ 2617 (88-րդ տեղ) վարկանիշները: Սերգեյ Մովսիսյանի վարկանիշը թեեւ մեկ կետով նվազել է (2646), սակայն նա պահպանել է իր դիրքը (50-րդ տեղ): Անփոփոխ են մնացել Սմբատ Լպուտյանի ցուցանիշներըՙ 2634 (60-րդ տեղ):

Հարկ է նշել, որ Հայաստանի շախմատիստներն իրենց միջին վարկանիշով աշխարհի 124 երկրների մեջ գրավում են բավական բարձր դիրք: Ցուցակում, որը 2720 միջին վարկանիշով գլխավորում է Ռուսաստանը, Հայաստանը 7-րդ տեղում է (2606): Միջին վարկանիշը հաշվելիս հաշվի են առնվում յուրաքանչյուր երկրից ամենաբարձր վարկանիշ ունեցող 10 շախմատիստների ցուցանիշները: Ինչպես եւ նախորդ ցուցակներում, ՖԻԴԵ-ի վարկանիշային աղյուսակը գլխավորում է աշխարհի 13-րդ չեմպիոն Գարի Կասպարովը: Նախորդ ցուցակի համեմատ լավագույն տասնյակում միայն մեկ փոփոխություն է կատարվել: Ռուսլան Պոնոմարյովին փոխարինել է Ալեքսեյ Շիրովը:

Կանանց վարկանիշային ցուցակը նախկինի պես մեծ առավելությամբ գլխավորում է հունգարուհի Հուդիթ Պոլգարը: 50 լավագույնների ցանկում Հայաստանից միայն Էլինա Դանիելյանն է, որը վերջերս 6-րդ անգամ նվաճեց հանրապետության չեմպիոնուհու տիտղոսը: Էլինան 2430 գործակցով 31-րդ տեղում է: Ներկայացնում ենք ՖԻԴԵ-ի վարկանիշային աղյուսակի լավագույն տասնյակները:

Տղամարդիկ

Կանայք

Պատանիներ

Աղջիկներ