Այսօր կկայանան ՈՒԵՖԱ-ի գավաթի խաղարկության որակավորման առաջին փուլի պատասխան հանդիպումները: Մրցասպարեզ կմտնեն նաեւ Հայաստանի պատվիրակներըՙ «Բանանցը», «Միկան» եւ «Շիրակը»: Հաշվի առնելով անցյալի դառը փորձը եւ առաջին հանդիպումներում մեր թիմերի ցուցադրած ցածրորակ խաղն, անկեղծ ասած, չենք հավատում, որ նրանցից գոնե մեկը կարողանա ռեւանշի հասնել եւ հաղթահարել առաջին փուլի արգելքը: Թերեւս ավելի դյուրին կարող է թվալ «Բանանցի» խնդիրը, որն այսօր «Հանրապետական» մարզադաշտում հյուրընկալելու է ուկրաինական «Իլյիչեւեցին»: Վերջինիս մեր ակումբը պարտվել էր 0-2 հաշվով: Այդ խաղը կսկսվի ժամը 20-ին: Երեւանի ժամանակով ժամը 22-ին Տիրասպոլում կսկսվի տեղի համանուն թիմի եւ Գյումրու «Շիրակի» մրցավեճը: Հիշեցնենք, որ Երեւանում «Շիրակը» զիջել էր 1-2 հաշվով: Իսկ մեկ ժամ հետո Հունգարիայում կսկսվի «Հոնվեդ»-«Միկա» պատասխան հանդիպումը: «Միկան» էլ Երեւանում պարտվել էր 0-1 հաշվով: Շատ կցանկանայինք սխալվել մեր կանխատեսումներում, սակայն, ցավոք, իրականությունն այս է: Այսօր հայկական ակումբները մրցունակ չեն եվրոպական ասպարեզում, որի հետեւանքը կրկին դառը պարտություններն են: