Ռուսաստանի արտգործնախարար Սերգեյ Լավրովը, ըստ «Ռուսաստանի ձայն» ռադիոկայանի, չի բացառում Բեսլանի դպրոցի գրավման եւ Հարավային Օսիայի իրավիճակի լարվածության միջեւ կապը: Մյուս կողմից, Լավրովն ընդունել է, թե չի կարող ներկայացնել կոնկրետ փաստեր, որոնք կվկայեն, որ «այդ իրադարձությունները փոխկապակցված են եւ ծրագրվել են մեկ կենտրոնից»: «Վրացական կողմի պատճառով Հարավային Օսիայում ստեղծված ճգնաժամի հետեւանքները եւ Հյուսիսային Օսիայում պատանդներ վերցնելը որոշ մտահոգությունների տեղիք են տալիս, եւ քաղաքական գործիչները պարտավոր են չբացառել, որ դա պատահական չէ», ասել է Լավրովը:
Ավելի վաղ Վրաստանի նախկին պաշտպանության նախարար Թենգիզ Կիտովանին «Տրուդ» թերթին տված հարցազրույցում ասել էր. «Բեսլանում պատանդների գերեվարումն ուղղակիորեն կապված է Հարավային Օսիայի եւ ողջ Հյուսիսային Կովկասի հակամարտությունների հետ»: Կիտովանին պնդել է, որ չեչեն գրոհայինները ճամբարներ են ունեցել Պանկիսի կիրճում: «Այն ժամանակ նրանց համարում էին հարգարժան հյուրեր: Շեւարդնաձեն բացահայտորեն հաճոյախոսում էր ավազակներին», ասել է Կիտովանին: