Տասը տարի առաջ սեպտեմբերի 9-ին Երեւանի պետահամալսարանի բակում տեղի ունեցավ իր ծավալներով աննախադեպ ցույցՙ ի նշան ուսանողների իրավունքների պաշտպանության: Խնդիրը հետեւյալն էր. խորհրդային կարգերի փլուզումից հետո կրճատվեցին ուսանողներին տրվող նպաստները, 11 ակտիվ ուսանողներ խիստ նկատողության արժանացան: Ցույցից հետո համալսարանից հեռացված ուսանողը վերականգնվեց, իսկ ռեկտորը հեռացվեց աշխատանքից: 1994-ին սեպտեմբերի 9-ը ուսանողները հռչակեցին երիտասարդության սոցիալական եւ քաղաքացիական իրավունքների պաշտպանության օր:
Երեկ Գրողների միությունում կազմակերպված միջոցառման նպատակն էր վերհիշել երիտասարդական ուսանողական շարժման ակունքները, ապա հիմնադրել նոր միավոր, որ կզբաղվի վերը նշված խնդիրների լուծմամբ: «Երիտասարդական խորհուրդը պետք է զերծ լինի քաղաքական որեւէ ուժի ազդեցությունից, համոզված են նախաձեռնության հեղինակները: Մենք գրանցվելու խնդիր մեր առջեւ չենք դրել: Կան գրանցված երիտասարդական բազմաթիվ կառույցներ, սակայն ոչ բոլորն են իրենց նպատակին ծառայում»:
Հաստատակամություն ենք մաղթում ձեռնարկի հեղինակներին եւ ակնկալում, որ իրենք էլ ժամանակ անց չեն համալրի միայն կնիք եւ փաստաթուղթ ունեցող կազմակերպությունների շարքերը:
Թ. Մ.