Խաչվերացը Հայ Առաքելական Ս. Եկեղեցու հինգ տաղավար տոներից է եւ նշվում է սեպտեմբերի 14-ին մերձակա կիրակի օրը, այսինքն` սեպտեմբերի 11-17-ն ընկած ժամանակամիջոցում (այս տարի` սեպտեմբերի 12-ին): Տոնի կիրակի երեկոյան կատարվում են Ս. խաչի բարձրացման հանդիսավոր արարողություն եւ անդաստանի կարգ: Արարողությունն սկսվում է ռեհանով ու ծաղիկներով զարդարված խաչը հանդիսավոր թափորով եկեղեցու բակ դուրս բերելով: Զարդարված խաչով թափորապետը խաչակնքում եւ օրհնում է աշխարհի արեւելյան, արեւմտյան, հարավային եւ հյուսիսային կողմերը` բարեկարգություն ու խաղաղություն հայցելով Աստծուց եւ վարդաջուր ցողում հավատացյալների վրա, որից հետո խաչը ներս է տարվում եկեղեցի եւ դրվում Ս. սեղանի վրա: Արարողությունից հետո սկսվում է երեկոյան ժամերգություն: Անդաստանից հետո դարձյալ թափորով մտնում են եկեղեցի եւ երգում «Խաչի Քո, Քրիստոս, երկիրպագանեմք» շարականը: Այնուհետեւ սկսվում է երեկոյան ժամերգությունը, որից հետո ռեհաններն ու ծաղիկները բաժանվում են մասնակից ժողովրդին: