Ինչպիսի՞ն կլինի այն Բեռնար Կազոնիի համար
Ֆուտբոլի Հայաստանի ազգային հավաքականն ընտրական մրցաշարերում դեռ երբեք այսքան անհաջող չէր մեկնարկել: Ֆրանսիացի մասնագետ Բեռնար Կազոնիի գլխավորությամբ մեր ֆուտբոլիստները տանուլ են տվել ընտրական մրցաշարի մեկնարկային երկու հանդիպումներն ընդհանուր 0-5 հաշվով: Նույնիսկ 1994 թ., երբ հավաքականն իր նորամուտն էր նշում ընտրական մրցաշարերում, մեր ֆուտբոլիստները, Էդուարդ Մարգարովի գլխավորությամբ 2 խաղից հետո 1 միավոր էին վաստակել (Բելգիաՙ 0-2, Կիպրոսՙ 0-0): Լավագույն արդյունքը ցույց է տրվել Սուրեն Բարսեղյանի օրոք, 1998 թ.ՙ 4 միավոր (Անդորրաՙ 3-1, Իսլանդիաՙ 0-0): Ճիշտ է, 2 խաղերն էլ անցկացվել են սեփական դաշտում: 1996 թ. Խորեն Հովհաննիսյանի գլխավորությամբ հավաքականը մեկնարկում 2 խաղերն էլ ավարտել է ոչ-ոքի արդյունքով (Պորտուգալիաՙ 0-0, Հս. Իռլանդիաՙ 1-1): Վարուժան Սուքիասյանի (Նորվեգիաՙ 0-0, Ուկրաինաՙ 2-3) եւ Օսկար Լոպեսի (Ուկրաինաՙ 2-2, Հունաստանՙ 0-2) օրոք մեկնարկային 2 խաղում մեր ընտրանու հաշվին գրանցվել է մեկական միավոր:
Բեռնար Կազոնին 9-րդ մարզիչն է, որը ստանձնել է մեր հավաքականի ղեկը: Թե ի՞նչ ճակատագիր է սպասում նրան, ցույց կտա ժամանակը: Իսկ թե ինչպիսի՞ արդյունքների են հասել հավաքականը գլխավորած նախորդ 8 մարզիչները, ներկայացնում ենք ստորեւ:
Էդուարդ Մարգարովի օրոք հավաքականն իր անդրանիկ հաղթանակն է տոնել (16.7.94 թ. Մալթաՙ 1-0)ՙ միաժամանակ բացելով գոլերի հաշիվը (Արսեն Ավետիսյան): Ընտրական մրցաշարում հավաքականին այդպես էլ չհաջողվեց գտնել մրցակիցների դարպասի բանալին:
Սամվել Դարբինյանի գլխավորությամբ մեր ֆուտբոլիստները բացել են իրենց գոլերի հաշիվն ընտրական մրցաշարում (Ռազմիկ Գրիգորյան, 10.5.95 թ. Մակեդոնիայի հավաքականի դարպասըՙ 2-2) եւ տոնել առաջին հաղթանակը, այն էլ մրցակցի դաշտում (16.9.95 թ. Մակեդոնիաՙ 2-1): Իսկ ահա ընկերական հանդիպումներում հավաքականին չի հաջողվել գոլ խփել:
Խորեն Հովհաննիսյանի օրոք ՀՀ հավաքականն ընտրական մրցաշարերում հասել է լավագույն արդյունքի: 1998 թ. աշխարհի առաջնության ընտրական մրցաշարում Գերմանիայի, Ուկրաինայի, Պորտուգալիայի, Հյուսիսային Իռլանդիայի եւ Ալբանիայի հավաքականների հետ մրցավեճում մեր ընտրանին գրավել է 4-րդ տեղըՙ վաստակելով 8 միավոր (+1=5-4, 8-17): Միաժամանակ հենց Հովհաննիսյանի գլխավորությամբ է մեր հավաքականն ամենախոշոր հաշվով պարտությունը կրելՙ 0-7 (Չիլի, Վրաստան), 11 խաղ անընդմեջ հաղթանակ չի տոնել (5 ոչ-ոքի, 6 պարտություն):
Սուրեն Բարսեղյանը միակն է, որն իր նորամուտը հավաքականում նշել է 2 անընդմեջ հաղթանակով (Լիբանանՙ 1-0, Անդորրաՙ 3-1): Նրա գլխավորությամբ հավաքականն ընտրական մրցաշարում 2 հաղթանակ է տոնել (Անդորրաՙ 3-1, 3-0): Միեւնույն ժամանակ 7 խաղ շարունակ (որից 5-ն ընտրական մրցաշարում) հավաքականը չի կարողացել գեթ մեկ անգամ գրավել մրցակիցների դարպասներըՙ կրելով 4 անընդմեջ պարտություն:
Վարուժան Սուքիասյանի գլխավորությամբ հավաքականը բոլորից շատ (17) հանդիպումներ է անցկացրելՙ ընկերական խաղերում հասնելով դրական հաշվեկշռի: Իսկ ահա ընտրական մրցաշարում հավաքականն այդպես էլ չճաշակեց հաղթանակի քաղցրությունը:
Օսկար Լոպեսի ու Անդրանիկ Ադամյանի գլխավորությամբ հավաքականն ընդամենը 2-ական խաղ է անցկացրել:
Միխայ Ստոյկիցային էլ բախտ է վիճակվել նորամուտը հավաքականում նշել հաղթանակով, այն էլ ընտրական մրցաշարում (Հս. Իռլանդիաՙ 1-0): Սուրեն Բարսեղյանից հետո միայն Ստոյկիցային է հաջողվել իր սաների հետ ընտրական մրցաշարում 2 հաղթանակ տոնել, ընդ որում կրկին միեւնույն մրցակցիՙ Հս. Իռլանդիայի նկատմամբ (1-0, 1-0): Ընկերական մրցախաղերում Ստոյկիցայի արդյունքը լավագույնն է: Ընդհանուր ցուցանիշներով էլ փաստորեն լավագույն արդյունքը Ստոյկիցայինն է, քանի որ միավորների տոկոսային հարաբերությամբ նրան գերազանցող Անդրանիկ Ադամյանի գլխավորությամբ հավաքականն ընդամենը 2 ընկերական խաղ է անցկացրել ոչ այնքան ուժեղ մրցակիցների հետ (Անդորրաՙ 2-0, Իսրայելՙ 0-2):
Ընդհանուր ցուցանիշներ
| Խ | Հ | Ո | Պ | Գ | Մ | % | |
| 1. Անդրանիկ Ադամյան | 2 | 1 | 0 | 1 | 2-2 | 3 | 50,0 |
| 2. Միխայ Ստոյկիցա | 10 | 4 | 1 | 5 | 11-17 | 13 | 43,3 |
| 3. Սուրեն Բարսեղյան | 14 | 4 | 2 | 8 | 11-19 | 14 | 33,3 |
| 4. Վարուժան Սուքիասյան | 17 | 3 | 7 | 7 | 17-27 | 16 | 31,3 |
| 5. Էդուարդ Մարգարով | 6 | 1 | 2 | 3 | 1-5 | 5 | 27,7 |
| 6. Խորեն Հովհաննիսյան | 16 | 2 | 5 | 9 | 10-41 | 11 | 22,9 |
| 7. Օսկար Լոպես | 2 | 0 | 1 | 1 | 2-4 | 1 | 16,6 |
| 8. Սամվել Դարբինյան | 9 | 1 | 1 | 7 | 5-21 | 4 | 14,8 |
| 9. Բեռնար Կազոնի | 2 | 0 | 0 | 2 | 0-5 | 0 | 0 |
Ընտրական մրցաշարեր
| Խ | Հ | Ո | Պ | Գ | Մ | % | |
| 1. Միխայ Ստոյկիցա | 6 | 2 | 0 | 4 | 5-12 | 6 | 33,3 |
| 2. Սուրեն Բարսեղյան | 10 | 2 | 2 | 6 | 8-15 | 8 | 26,6 |
| 3. Խորեն Հովհաննիսյան | 10 | 1 | 5 | 4 | 8-17 | 8 | 26,6 |
| 4. Սամվել Դարբինյան | 7 | 1 | 1 | 5 | 5-13 | 4 | 19,0 |
| 5. Վարուժան Սուքիասյան | 10 | 0 | 5 | 5 | 7-19 | 5 | 16,6 |
| 6. Օսկար Լոպես | 2 | 0 | 1 | 1 | 2-4 | 1 | 16,6 |
| 7. Էդուարդ Մարգարով | 3 | 0 | 1 | 2 | 0-4 | 1 | 11,1 |
| 8. Բեռնար Կազոնի | 2 | 0 | 0 | 2 | 0-5 | 0 | 0 |
Ընկերական մրցախաղեր
| Խ | Հ | Ո | Պ | Գ | Մ | % | |
| 1. Միխայ Ստոյկիցա | 4 | 2 | 1 | 1 | 6-5 | 7 | 58,3 |
| 2. Վարուժան Սուքիասյան | 7 | 3 | 2 | 2 | 10-8 | 11 | 52,3 |
| 3. Սուրեն Բարսեղյան | 4 | 2 | 0 | 2 | 3-4 | 6 | 50,0 |
| 4. Անդրանիկ Ադամյան | 2 | 1 | 0 | 1 | 2-2 | 3 | 50,0 |
| 5. Էդուարդ Մարգարով | 3 | 1 | 1 | 1 | 1-1 | 4 | 44,4 |
| 6. Խորեն Հովհաննիսյան | 6 | 1 | 0 | 5 | 2-24 | 3 | 16,6 |
| 7. Սամվել Դարբինյան | 2 | 0 | 0 | 2 | 0-8 | 0 | 0 |