Այսօր ավարտվում է Ադրբեջանի պաշտպանության նախարար Սաֆար Աբիեւի պաշտոնական այցը Թուրքիա: Դա սկսվել էր հոկտեմբերի 4-ին: Հատկանշական է, որ Աբիեւին Թուրքիա էր հրավիրել ոչ թե նրա թուրք գործընկեր Վեջդի Գյոնուլը, այլ թուրքական զինված ուժերի գլխավոր շտաբի պետ Հիլմի Օզքյոքը: Թե ինչով է պայմանավորված Օզքյոքի հրավերը, դժվար է ասել: Համենայն դեպս, Աբիեւն այս հրավերով պաշտոնական 4-րդ այցելությունն է կատարել Թուրքիա: Այդ ընթացքում Թուրքիայի պաշտպանության նախարար Գյոնուլըՙ մեկ, իսկ գլխավոր շտաբի պետ Օզքյոքը 3 անգամ Ադրբեջան են այցելել:
Այցելության ընթացքում Աբիեւին, բացի Օզքյոքից, ընդունել է նաեւ Թուրքիայի նախագահ Ահմեդ Նեջդեթ Սեզերը, ապա նա հանդիպել է պաշտպանության նախարար Գյոնուլին: Աբիեւ-Օզքյոք հանդիպմանը, ինչպես այդ մասին նշեց թուրքական հանրային հեռուստատեսությունը, ստորագրվել է ռազմարդյունաբերության ոլորտում համագործակցության պայմանագիր: Ուշագրավ է նաեւ այդ պայմանագրի ստորագրումը թուրքական զինված ուժերի գլխավոր շտաբի պետի հետ:
Հ. Չ.