Հոկտեմբերի 6-ին Մայր աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունեց ԱՊՀ միջխորհրդարանական վեհաժողովի պաշտպանության եւ անվտանգության հարցերի մշտական հանձնաժողովի անդամներին: Արդյունավոր աշխատանք մաղթելով ԱՊՀ միջխորհրդարանական վեհաժողովի անդամներինՙ Վեհափառ հայրապետը կարեւորեց հատկապես ահաբեկչության, թմրամոլության եւ մարդկությանն սպառնացող այլ չարիքների դեմ պայքարում միասնական ջանքերի մեկտեղումը: Նորին սրբությունը նշեց, որ այդ համագործակցությունն անհրաժեշտ է նաեւ մեր անկախացած երկրների տնտեսական առաջընթացի եւ ժողովուրդների բարօրության համար:
ՄԽՎ պաշտպանության եւ անվտանգության հարցերի մշտական հանձնաժողովի նախագահ Վիկտոր Վոյտենկոն շնորհակալություւն հայտնելով Վեհափառ հայրապետին ընդունելության համար` Նորին Սրբությանը ներկայացրեց համաժողովի աշխատանքներն ու ապագա ծրագրերը: