Արցախի կոմունիստները հոկտեմբերի 6-ին գումարեցին իրենց հերթականՙ 4-րդ համագումարը: Չնայած կոմունիստների մեծ քանակին, ԼՂՀ քաղաքական ներկապնակում նրանց ակտիվությունն այնքան էլ նկատելի չէ: Դա փաստվում է նախ եւ առաջ այն հանգամանքով, որ Արկոմկուսը իր ներկայացուցիչները չունի հանրապետության խորհրդարանում: Միեւնույն ժամանակ կոմունիստները իրենց թեկնածուն չեն առաջադրել ինչպես 2002 թ. ԼՂՀ նախագահական, այնպես էլ, մասնավորապես, այս տարվա օգոստոսին կայացած Ստեփանակերտի քաղաքապետի ընտրությունների ժամանակ:
Բնականաբար, նաեւ իրենց քաղաքական ակտիվությունը բարձրացնելու խնդիր էր դրված այս համաժողովում: Ներկայացնելով վերջին 3 տարվա գործունեությունը եւ կուսակցության հերթական խնդիրները, ԼՂՀ կոմկուսի կենտկոմի առաջին քարտուղար Հրանտ Մելքումյանը առաջնահերթեց ԼՂՀ միջազգային ճանաչման հասնելու անհրաժեշտությունը: Այս առումով նա նշեց, որ Ղարաբաղը որպես անկախ եւ ինքնիշխան պետություն, պետք է քաղաքական կամքը բոլոր քննարկումներում արտահայտի Ադրբեջանի հետ հավասար իրավունքովՙ այս տեսանկյունից ընդգծելով ղարաբաղյան կարգավորման բանակցություններում ԼՂՀ-ի անմիջական մասնակցությունը: Մյուս կողմից, ըստ Արցախի կոմունիստների ղեկավարի, ԼՂՀ-ն պետք է «եղբայրական բարեկամությունն ու համագործակցությունը ամրապնդի Ռուսաստանի Դաշնության հետ իբրեւ քաղաքական անկախության եւ տնտեսական զարգացման հնարավորության ապահովում»:
Հանրապետության տնտեսության մեջ տեղի ունեցած առաջընթաց քայլերը վկայաբերելով, Հ. Մելքումյանը սակայն Արցախի տնտեսության այսօրվա վիճակը գնահատեց ճգնաժամային, իսկ բնակչության կենսամակարդակըՙ խիստ ցածր, այս առնչությամբ ներկայացնելով կոմկուսի մոտեցումները:
Համագումարի աշխատանքներին մասնակցեց եւ ելույթ ունեցավ Հայաստանի կոմկուսի առաջին քարտուղար Ռուբեն Թովմասյանը: Իսկ ՌԴ կոմունիստների ղեկավար Գ. Զյուգանովն իր կուսակիցներին ողջույնի ուղերձ էր հղել:
Նույն օրը կայացած պլենումում Արցախի կոմկուսի ղեկավար վերընտրվեց Հրանտ Մելքումյանը:
ԿԻՄ ԳԱԲՐԻԵԼՅԱՆ, Ստեփանակերտ