Շախմատի Եվրոպայի թիմային առաջնության 4-րդ տուրից հետո տղամարդկանց մրցաշարում 8 միավորով միանձնյա առաջատարի դերը ստանձնեց գործող չեմպիոն ֆրանսիական NAO Chess Club-ը: Հերթական հաղթանակը ֆրանսիական ակումբը տոնեց «Տոմսկ-400–ի» նկատմամբՙ 5–1: Ֆրանսիացիներին հաղթական միավորներ պարգեւեցին Ալեքսանդր Գրիշչուկը, Ֆրանցիսկո Վալյեխոն, Թեյմուր Ռաջաբովն ու Լաուրենտ Ֆրեսինեթը:
«Մաքս Վենը» 3,5–2,5 հաշվով հաղթելով «Վեսնիանկային», վաստակեց 7 միավոր: Թիմի կազմում 2-րդ անգամ հանդես եկավ Ռաֆայել Վահանյանը, որն այս անգամ բավարարվեց ոչ-ոքիովՙ միավորը կիսելով Անդրեյ Զիգալկոյի հետ պարտիայում: Ոչ-ոքի ավարտվեց նաեւ Կասպարով-Ազարով պարտիան: Նման ելք ունեցավ 5 պարտիա: Փաստորեն «Մաքս Վենի» հաղթանակն ապահովեց Ալեքսանդր Բելյավսկինՙ պարտության մատնելով Անդրեյ Մալյուշին:
«Բոսնիայի» կազմում վստահ ելույթ է ունենում Սերգեյ Մովսիսյանը: Նա 3-րդ հաղթանակը տոնեցՙ պարտության մատնելով «Էսզացիբասի» թիմի շախմատիստ Սելիմ Գուրչանին: Մովսիսյանն իր թիմին արդեն 3,5 միավոր է պարգեւել: Իսկ «Բոսնիան» հերթական տուրում հաղթեց 5,5–0,5 հաշվով եւ վաստակեց եւս 7 միավոր: Նույնքան միավոր ունեն նաեւ «Բեեր Շեւան» ու «Պոլոնիան», որոնց հանդիպումն ավարտվեց ոչ-ոքի, ընդ որումՙ բոլոր 6 պարտիաներում էլ մրցակիցները խաղաղ դաշն էին կնքել:
5-րդ տուրում ուշադրության կենտրոնում կլինի «Մաքս Վենի» եւ NAO Chess Club-ի մրցավեճը: Մեծ հետաքրքրությամբ է սպասվում Կասպարով-Ադամս պարտիան:
Կանանց մրցապայքարում առաջին միավորը կորցրեց միանձնյա առաջատար Թբիլիսիի NTN-ը, որը ոչ-ոքի (2–2) խաղաց Կազանի «Լադյայի» հետ: Վրաց շախմատիստուհիներն ունեն 7 միավոր, 6-ական միավորով հաջորդ տեղերում են «Ֆինեսը», «Ինտերնետ Պոդգորիցան» եւ «Լադյան»:
ԱՇՈՏ ՀԱՅՐԱՊԵՏՅԱՆ