Ֆուտբոլի Հայաստանի առաջնության 25-րդ տուրում Երեւանի «Փյունիկը» ժամկետից շուտ պաշտոնապես գրանցեց իր հերթական չեմպիոնությունը: «Փյունիկը» 4-րդ տարին անընդմեջ հռչակվեց ՀՀ չեմպիոն: Փյունիկցիները Հայաստանի առաջնություններում 7-րդ անգամ ճանաչվեցին ուժեղագույնը: Այս երկու ցուցանիշներն էլ ռեկորդային են:
«Փյունիկի» չեմպիոնությունը ոչ մեկի կասկածը չէր հարուցում դեռեւս առաջնության երկրորդ շրջանի ավարտից հետո: Թեեւ թիմում մեծ մասամբ երիտասարդներ են, սակայն «Փյունիկի» առավելությունը մրցակիցների նկատմամբ ակնհայտ է: 25-րդ տուրում 6-1 հաշվով հաղթելով «Կոտայքին», փյունիկցիներն անհասանելի դարձան մրցակիցների նկատմամբ: Այդ խաղում «հեթ-տրիկի» հեղինակ դարձավ Գալուստ Պետրոսյանը, որը 19 գնդակով կրկին գլխավորեց առաջնության լավագույն ռմբարկուների ցուցակը: Իսկ ահա նրա թիմակից Էդգար Մանուչարյանը, որ նախորդ խաղում 3 գնդակ էր խփել եւ 17 գնդակով լավագույն ռմբարկուն էր, այս անգամ չկարողացավ իր հաշվին գոլ գրանցել: «Կոտայքի» դարպասը մեկական գնդակ խփեցին նաեւ Աղվան Մկրտչյանը, Լեւոն Փաչաջյանն ու Տիգրան Դավթյանը: «Կոտայքից» միակ գոլն իր օգտին գրանցեց Արման Մինասյանը: Նշենք, որ «Կոտայքի» նկատմամբ հերթական հաղթանակը «Փյունիկի» 15-րդ անընդմեջ հաղթանակն էր: Դա Հայաստանի առաջնությունների յուրօրինակ ռեկորդ է: Ավելացնենք նաեւ, որ արդեն 2-րդ մրցաշրջանն է, ինչ «Փյունիկը» դեռեւս չի պարտվել: Թիմի անպարտելի խաղերի քանակը տպավորիչ է (56 խաղ):
Եթե չեմպիոնության համար մրցավեճի ելքը վաղուց էր վճռված, ապա մրցանակային մյուս երկու տեղերի համար թեժ պայքար է ընթանում: Այս առումով շատ հետաքրքրական էին «Բանանց»-«Միկա» եւ «Արարատ»-«Կիլիկիա» հանդիպումները: Առաջին խաղում գրանցվեց ոչ-ոքի (1-1): Հաշիվը 4-րդ րոպեին բացեց «Միկայի» հարձակվող Արմեն Շահգելդյանը, իսկ 60-րդ րոպեին «Բանանցի» ֆուտբոլիստ Ռոմեո Ջենեբյանը վերականգնեց հավասարակշռությունը: Իսկ ահա «Արարատը» շնորհիվ բրազիլացի Ռենատոյի խփած միակ գոլի հույժ կարեւոր հաղթանակ տարավ եւ շրջանցեց «Բանանցին»:
Ընթացիկ առաջնությունում չափազանց սուր մրցակցություն է ծավալվել բարձրագույն խմբում տեղը պահպանելու համար: «Կիլիկիան» ու «Կոտայքը» պարտվեցին: Իսկ ահա «Շիրակը» Գյումրիում մեկ միավոր վաստակեց «Դինամո-Զենիթի» հետ մրցախաղում: Գրանցված 2 գոլերն էլ խփվեցին 11 մ հարվածներով: Նախ դիպուկ հարվածով աչքի ընկավ հյուրերից Լեւոն Սարգսյանը, ապա 11 մ-ն իրացրեց շիրակցի Երվանդ Հակոբյանը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 23 | 20 | 3 | 0 | 78-21 | 63 |
| 2. Միկա | 23 | 13 | 6 | 4 | 34-22 | 45 |
| 3. Արարատ | 25 | 11 | 6 | 8 | 38-30 | 39 |
| 4. Բանանց | 24 | 11 | 5 | 8 | 36-33 | 38 |
| 5. Դ.-Զենիթ | 24 | 7 | 6 | 11 | 21-39 | 27 |
| 6. Շիրակ | 25 | 4 | 8 | 13 | 25-44 | 20 |
| 7. Կոտայք | 24 | 4 | 6 | 14 | 25-48 | 18 |
| 8. Կիլիկիա | 24 | 4 | 4 | 16 | 26-46 | 16 |
Ռմբարկուները
| Գալուստ Պետրոսյան «Փյունիկ» | 19 |
| Էդգար Մանուչարյան «Փյունիկ» | 17 |
| Նշան Էրզրումյան «Կիլիկիա» | 15 |
| Լեւոն Փաչաջյան «Փյունիկ» | 13 |
| Արմեն Շահգելդյան «Միկա» | 11 |
ԱՇՈՏ ՀԱՅՐԱՊԵՏՅԱՆ