Ֆուտբոլի Հայաստանի բարձրագույն խմբի առաջնության 26-րդ տուրի 4 հանդիպումներից երեքը վճռորոշ նշանակություն ուներ մրցակիցների համար: Տուրի կենտրոնական հանդիպումն, անշուշտ, «Միկայի» եւ «Արարատի» մրցավեճն էր: Մրցանակային տեղերի հավակնորդ թիմերի համար հանդիպման ելքը հսկայական նշանակություն ուներ: Հաղթանակի դեպքում «Միկան» փաստորեն իր համար կապահովեր արծաթե մեդալները, իսկ ահա պարտությունը բավական խոչընդոտներ կստեղծեր պարգեւների համար մղվող պայքարում: Նույնը վերաբերում է նաեւ արարատցիներին, որոնք անհաշտ պայքար են մղում բրոնզե մեդալների համար: Այդ խաղում հաջողությունն ուղեկցեց «Միկայի» ֆուտբոլիստներին: Հաշիվը 30-րդ րոպեին բացեց Հրաչյա Միքայելյանը, իսկ խաղավարտից 10 րոպե առաջ թիմի փորձառու պաշտպան Հովհաննես Թահմազյանն ամրապնդեց «Միկայի» հաղթանակը: Արարատցիների համար այս պարտությունը կարող է ճակատագրական լինել մրցանակային երրորդ տեղի համար մղվող պայքարում, քանի որ նրանց գլխավոր մրցակիցըՙ «Բանանցը», 2-0 հաշվով պարտության մատնեց «Կոտայքին»: «Բանանցի» ֆուտբոլիստները հանդիպման ելքը փաստորեն վճռեցին առաջին 20 րոպեներին, երբ Ռոմեո Ջենեբյանն ու Արթուր Պետրոսյանը 2 անգամ գրավեցին մրցակցի դարպասը: Թեեւ 39-րդ րոպեին դաշտից հեռացվեց Պետրոսյանը, եւ «Բանանցը» խաղը շարունակեց 10 հոգով, սակայն կոտայքցիներին այդպես էլ չհաջողվեց իրացնել թվային առավելությունը:
Չափազանց սրվեց իրավիճակն աղյուսակի ստորին հորիզոնականներում, որտեղ 3 թիմեր անհաշտ պայքար են մղում ուժեղագույնների խմբում իրենց տեղը պահպանելու համար: Այդ պայքարում չափազանց կարեւոր հաղթանակ տոնեց «Կիլիկիան»ՙ սեփական հարկի տակ պարտության մատնելով իր գլխավոր հակառակորդներից մեկինՙ «Շիրակին» (2-1): «Կիլիկիայից» աչքի ընկան թիմի լավագույն ռմբարկու Նշան Էրզրումյանն ու Սուրեն Աթոյանը, «Շիրակից» միակ գոլի հեղինակը Արտյոմ Բեռնեցյանն էր: Այդ հաղթանակի շնորհիվ «Կիլիկիան» շրջանցեց «Կոտայքին»: Եթե մրցանակային տեղերի համար պայքարում իրադրությունը բավական պարզվեց, ապա աղյուսակի ստորին հորիզոնականներում այն ավելի բարդացավ:
Տուրի հանդիպումներից միայն «Փյունիկի» եւ «Դինամո-Զենիթի» մրցավեճն էր, որ մարզական առումով մրցակիցների համար այլեւս ոչ մի նշանակություն չուներ: Միակ հետաքրքրությունը ներկայացնում էր առաջնության լավագույն ռմբարկուի կոչման համար պայքարող փյունիկցիներ Գալուստ Պետրոսյանի եւ Էդգար Մանուչարյանի մրցավեճը: Նշենք, որ երկու ֆուտբոլիստներն էլ հաշվետու խաղում փորձում էին իրենք եզրափակել գրոհներըՙ երբեմն անտեսելով ավելի հարմար դիրքում գտնվող խաղընկերներին: Մրցակցի դարպասը խփած 7 անպատասխան գոլերից 3-ն իր օգտին գրանցեց Էդգար Մանուչարյանը, 2-ըՙ Գալուստ Պետրոսյանը: 1-ական գնդակ էլ խփեցին թիմի սեւամորթ լեգեոներներ Կառլ Լոմբեն եւ Մամադու Դիավարան:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 24 | 21 | 3 | 0 | 85-21 | 66 |
| 2. Միկա | 24 | 14 | 6 | 4 | 36-22 | 48 |
| 3. Բանանց | 25 | 12 | 5 | 8 | 38-33 | 41 |
| 4. Արարատ | 26 | 11 | 6 | 9 | 38-32 | 39 |
| 5. Դ.-Զենիթ | 25 | 7 | 6 | 12 | 21-46 | 27 |
| 6. Շիրակ | 26 | 4 | 8 | 14 | 26-46 | 20 |
| 7. Կիլիկիա | 25 | 5 | 4 | 16 | 28-47 | 19 |
| 8. Կոտայք | 25 | 4 | 6 | 15 | 25-50 | 18 |
Ռմբարկուները
| Գալուստ Պետրոսյան | «Փյունիկ» | 21 |
| Էդգար Մանուչարյան | «Փյունիկ» | 20 |
| Նշան Էրզրումյան | «Կիլիկիա» | 16 |
| Լեւոն Փաչաջյան | «Փյունիկ» | 13 |
| Արմեն Շահգելդյան | «Միկա» | 11 |
Աշոտ Հայրապետյան