«Միկան» արծաթե մեդալակիր
Ֆուտբոլի Հայաստանի բարձրագույն խմբի առաջնության նախավերջին տուրը որոշեց արծաթե մրցանակակրին: Աշտարակի «Միկան» Գյումրիում ոչ-ոքի (0-0) ավարտելով հանդիպումը «Շիրակի» հետ, անհասանելի դարձավ հետապնդողների համար եւ իր պատմության մեջ առաջին անգամ դարձավ մրցանակակիր, որի առթիվ շնորհավորում ենք ֆուտբոլիստներին, մարզչական կազմին ու ակումբի ղեկավարությանը: Իսկ ահա բրոնզե մեդալների համար մրցավեճը շարունակվում է եւ առաջնության վերջնագծում հասել է իր գագաթնակետին: Այդ պայքարում չափազանց կարեւոր նշանակություն ունեին հերթական տուրի «Արարատ»-«Կոտայք» եւ «Բանանց»-«Փյունիկ» հանդիպումների ելքերը: Ավելի դժվարին էր «Արարատի» խնդիրը, քանի որ նրա մրցակիցը կենաց-մահու պայքար է մղում բարձրագույն խմբում իր տեղը պահպանելու համար: Արարատցիների հետ հանդիպումն անցավ բավական սուր եւ անզիջում պայքարում: Դաշտի տերերը նկատելի խաղային եւ տարածքային առավելություն ունեին, սակայն երկար ժամանակ նրանց չէր հաջողվում դա վերածել գոլի, քանի որ «Կոտայքը» հստակորեն էր պաշտպանվում:
Միայն երկրորդ խաղակեսում արարատցիներին ի վերջո հաջողվեց գրավել «Կոտայքի» դարպասը: Դիպուկ հարվածով աչքի ընկավ թիմի լեգեոներ Էմանուել Էզուկամը: Բաց թողած գոլից հետո կոտայքցիները դիմեցին վճռական գործողությունների: Խաղավերջում նրանք երկու վտանգավոր պահ ստեղծեցին «Արարատի» դարպասին, սակայն հաջող խաղաց դարպասապահ Ռադաջան: Իրենց հերթին արարատցիներն էլ կարող էին ավելացնել հաշիվը, սակայն հարմար դիրքերից վրիպեցին Սուլաբերիձեն եւ Մինասյանը: «Արարատն» անչափ կարեւոր հաղթանակ տոնեց եւ շարունակում է պայքարը բրոնզե մեդալների համար:
Արարատցիների գլխավոր հակառակորդներըՙ «Բանանցի» ֆուտբոլիստները հյուրընկալել էին երկրի նորընծա չեմպիոն «Փյունիկին», որը մինչ այդ 16 անընդմեջ հաղթանակ էր տոնել: Ակնկալվում էր, որ «Բանանցի» հետ խաղում էլ փյունիկցիները կջանան շարունակել իրենց հաղթարշավը, իսկ թիմի հարձակվողներ Էդգար Մանուչարյանն ու Գալուստ Պետրոսյանը կփորձեն ավելացնել իրենց խփած գոլերի քանակը: Սակայն ի զարմանս շատերի, «Փյունիկի» մարզիչներն առաջնության գլխավոր ռմբարկուի կոչման համար պայքարող երկու ֆուտբոլիստներին էլ չէին հայտավորել հանդիպմանը: Բնականաբար, այդ խաղում միավորներն անհրաժեշտ էին միայն «Բանանցին» եւ վերջինս հասավ իր նպատակին: Թեեւ առաջինը հաշիվը բացեցին փյունիկցիները (39-րդ րոպեին 11 մ հարվածը հստակ իրացրեց Կարեն Ալեքսանյանը), սակայն 6 րոպե անց «Բանանցի» ռմբարկու Սամվել Մելքոնյանը վերականգնեց հավասարակշռությունը: Ընդմիջումից հետո հաշվի մեջ փոփոխություն մտցնելու ֆուտբոլիստների բոլոր ջանքերն ապարդյուն անցան:
Այսպիսով, 3-րդ տեղի համար մրցապայքարում վերջին տուրից առաջ բավական հետաքրքրական իրավիճակ է ստեղծվել: Այդ պայքարում վճռորոշ կարող է լինել ավարտական տուրում «Արարատի» եւ «Բանանցի» միջեւ կայանալիք հանդիպումը: Նկատենք, որ «Բանանցը» դեռեւս մեկ հետաձգված խաղ ունի անցկացնելու «Միկայի» հետ, որի ժամկետը դեռեւս հայտնի չէ: Բացառված չէ, որ բրոնզե մեդալների տիրոջը որոշելու համար հարկ լինի հաշվի առնել «Արարատի» եւ «Բանանցի» միջեւ անցկացված հանդիպումների արդյունքները եւ նույնիսկ առաջնությունում թիմերի խփած գոլերի ընդհանուր քանակը: Այնպես որ, ֆուտբոլասերներին առաջնության բավական հետաքրքրական վերջաբան է սպասվում:
Բարձրագույն խմբում տեղը պահպանելու համար պայքարում անչափ կարեւոր հաղթանակ տոնեց «Կիլիկիան», որն Աբովյանում հաղթեց առաջնության նկատմամբ իր հետաքրքրությունը կորցրած «Դինամո-Զենիթին»: Հետաքրքրական է, որ հաղթական գոլի հեղինակը վերջինիս նախկին ֆուտբոլիստ Սարգիս Նազարյանն է, որը գոլով նշանավորեց ՀՀ առաջնություններում իր հոբելյանականՙ 250-րդ խաղը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 25 | 21 | 4 | 0 | 86-22 | 67 |
| 2. Միկա | 25 | 14 | 7 | 4 | 36-22 | 49 |
| 3. Բանանց | 26 | 12 | 6 | 8 | 39-34 | 42 |
| 4. Արարատ | 27 | 12 | 6 | 9 | 39-32 | 42 |
| 5. Դ.-Զենիթ | 26 | 7 | 6 | 13 | 21-47 | 27 |
| 6. Շիրակ | 27 | 4 | 9 | 14 | 26-46 | 21 |
| 7. Կիլիկիա | 26 | 6 | 4 | 16 | 29-47 | 22 |
| 8. Կոտայք | 26 | 4 | 6 | 16 | 25-51 | 18 |
Ռմբարկուները
| Գալուստ Պետրոսյան | «Փյունիկ» 21 |
ԱՇՈՏ ՀԱՅՐԱՊԵՏՅԱՆ