Երկրի չեմպիոն «Փյունիկի» եւ արծաթե մրցանակակիր «Միկայի» հանդիպումով ավարտվեց ֆուտբոլի Հայաստանի 13-րդ առաջնությունը: Չեմպիոնը մեկ անգամ եւս հաստատեց իր առավելությունն արծաթե մրցանակակրի նկատմամբ: 75-րդ րոպեին փյունիկցի Ալեքսանդր Պետրոսյանի խփած միակ գնդակը հաղթանակ պարգեւեց իր թիմին: Ընդ որում, փյունիկցիները 61-րդ րոպեից խաղադաշտում խաղում էին 10 ֆուտբոլիստով: Վերջին հույսի խախտման համար դաշտից հեռացվել էր «Փյունիկի» ավագ Սարգիս Հովսեփյանը: Սակայն, չնայած թվային գերակշռությանը, «Միկայի» ֆուտբոլիստներին այդպես էլ չհաջողվեց խույս տալ պարտությունից:
«Փյունիկն» այս տարի էլ ակնհայտ առավելության հասավ մրցակիցների նկատմամբ: Տպավորիչ է «Միկայի» նկատմամբ չեմպիոնի 16 միավորի առավելությունը: Անցյալ տարի 1-ին եւ 2-րդ տեղերը գրաված «Փյունիկի» ու «Բանանցի» միջեւ միավորների տարբերությունը 8 էր: «Միկայի» նկատմամբ նման մեծ առավելությունը ձեռք է բերվել նախ եւ առաջ այդ թիմի հետ անձնական հանդիպումներում տոնած 3 հաղթանակի եւ մեկ ոչ-ոքիի շնորհիվ: Նույնը կարելի է ասել նաեւ «Միկայի» եւ «Բանանցի» միջեւ 12 միավորի տարբերության մասին: Չորս հանդիպումներում «Միկան» տոնել է 3 հաղթանակ, մեկն ավարտել ոչ-ոքի:
Հատկանշական է, որ առաջնության լավագույն ռմբարկուներ ճանաչվեցին փյունիկցիներ Գալուստ Պետրոսյանն ու Էդգար Մանուչարյանը: Գալուստը չմասնակցեց «Փյունիկի» վերջին չորս հանդիպումներին: Նա մեկնել էր Մոլդովաՙ տեղի «Զիմբրու» թիմում փորձաշրջան անցնելու: Այդ ընթացքում Էդգարը հիանալի հնարավորություն էր ստացել շրջանցելու խաղընկերոջը, սակայն դա նրան չհաջողվեց: Երկու ֆուտբոլիստներն էլ առաջին անգամ են ճանաչվում առաջնության լավագույն ռմբարկու:
Ամփոփիչ աղյուսակ
| Խ | Հ | Ո | Պ | Գ | Մ | |
| 1. Փյունիկ | 28 | 22 | 5 | 1 | 89-25 | 71 |
| 2. Միկա | 28 | 16 | 7 | 5 | 41-23 | 55 |
| 3. Բանանց | 28 | 12 | 7 | 9 | 40-39 | 43 |
| 4. Արարատ | 28 | 12 | 7 | 9 | 40-33 | 43 |
| 5. Դ.-Զենիթ | 28 | 7 | 6 | 15 | 23-51 | 27 |
| 6. Կիլիկիա | 28 | 7 | 5 | 16 | 32-49 | 26 |
| 7. Կոտայք | 28 | 6 | 6 | 16 | 31-54 | 24 |
| 8. Շիրակ | 28 | 4 | 9 | 15 | 27-49 | 21 |
Ռմբարկուները
| Գալուստ Պետրոսյան | «Փյունիկ» | 21 |
| Էդգար Մանուչարյան | «Փյունիկ» | 21 |
| Նշան Էրզրումյան | «Կիլիկիա» | 18 |
| Լեւոն Փաչաջյան | «Փյունիկ» | 13 |
| Արմեն Շահգելդյան | «Միկա» | 12 |
| Դավիթ Գրիգորյան | «Միկա» | 11 |