Ազգային գրադարանի եւ Կոմիտասի անվան պետական կոնսերվատորիայի դոցենտ Կարինե Գասպարյանի համատեղ ջանքերով հրատարակվել են Գեորգի Սարաջյանի «Էքսպրոմտ» ջութակի, թավջութակի եւ դաշնամուրի համար ու Սոֆա Ազնավուրյանի «Վոկալ շարքՙ Մկրտիչ Սարգսյանի բանաստեղծություններով» ձայնի եւ դաշնամուրի համար գրքերը: Ի դեպ, Սոֆա Ազնավուրյանի շարքը, որը կազմված է 5 ռոմանսներից, նվիրված է Լուսինե Զաքարյանի 65-ամյա հիշատակին: Այս գրքերի շնորհանդեսը Ազգային գրադարանը համատեղել էր գրող, հրապարակախոս Մկրտիչ Սարգսյանի ծննդյան 80 եւ Գեորգի Սարաջյանի 85-ամյա հոբելյանական տոնին: «Մեր կոմպոզիտորական դպրոցի շատ արժեքավոր ստեղծագործություններ չեն հրատարակվում եւ ունենալով շատ գործերի բնագրեր, մեր խմբագրական խորհուրդը խմբագրեց դրանք եւ ներկայացրեց հրատարակության», պատմեց Կարինե Գասպարյանը:
Հրատարակված 2 գրքերն էլ չեն վաճառվում, այլ բաժանվում են, եւ, ինչպես նշեց գրքերի խմբագիր Կարինե Գասպարյանը, նման գրքերի հրատարակումը շատ կարեւոր է, դրա նպատակը հայ երաժշտությունը դրսում ներկայացնելն է: Ելույթ ունեցողները մեծարեցին հայ տաղանդաշատ ստեղծագործողներինՙ կարեւորելով մշակույթ բերած նրանց ավանդը եւ շնորհակալություն հայտնեցին գրքերի հրատարակման գործում աջակցություն ցուցաբերողներին:
Լուսինե Զաքարյանի անունից շնորհակալական խոսք ասաց Խորեն Պալյանըՙ նշելով, որ առաջին անգամն է, որ Լուսինե Զաքարյանին նվիրված խոսքերի համար երաժշտություն է գրվում:
Շնորհանդեսին ներկայացվեցին նաեւ կատարումներ Գեորգի Սարաջյանի «Էքսպրոմտ» եւ Սոֆա Ազնավուրյանի «Վոկալ» շարքերից:
ԳՈՀԱՐ ԳԵՎՈՐԳՅԱՆ