«ԱԶԳ» ՕՐԱԹԵՐԹ

ԷԴԳԱՐ ՄԱՆՈՒՉԱՐՅԱՆԸ ՀԱՅԱՍՏԱՆԻ ԼԱՎԱԳՈՒՅՆ ՖՈՒՏԲՈԼԻՍՏ

Ավանդույթի համաձայն, յուրաքանչյուր մրցաշրջանի ավարտից հետո հարցման միջոցով որոշվում է Հայաստանի լավագույն ֆուտբոլիստը: Այս անգամ հարցումն անցկացվեց ֆուտբոլի հանրապետական ֆեդերացիայի մամուլի քարտուղարության կողմից: Բացի լրագրողներից, հարցմանը մասնակցել են նաեւ բարձրագույն խմբի 8 ակումբների նախագահները, գլխավոր մարզիչները, մարզչական շտաբները, ինչպես նաեւ բարձրագույն խմբի հանդիպումները սպասարկած մրցավարներն ու տեսուչները: Ընդ որում, ակումբների ներկայացուցիչները իրավունք չունեին լավագույն ֆուտբոլիստների եռյակում նշելու իրենց թիմի խաղացողի թեկնածությունը: Հարցման արդյունքներով հարցաթերթիկում առաջին տեղում նշված ֆուտբոլիստին տրվել է 5 միավոր, երկրորդ տեղինՙ 3, երրորդինՙ 1:

Հարցման արդյունքներով 2004 թ. Հայաստանի լավագույն ֆուտբոլիստ է ճանաչվել Երեւանի «Փյունիկի» եւ ազգային հավաքականի հարձակվող Էդգար Մանուչարյանը: Հարցաթերթիկներում նրա ազգանունը 48 անգամ նշվել է 1-ինը, 13 անգամՙ 2-րդը, 1 անգամՙ 3-րդը: Արդյունքում Էդգար Մանուչարյանը վաստակել է 280 միավոր: Երկրորդը ճանաչվել է «Միկայի» եւ ազգային հավաքականի հարձակվող Արմեն Շահգելդյանը: Նրան ընդհանուր առմամբ ձայն են տվել հարցման 38 մասնակիցներ: 11 անգամ Շահգելդյանի ազգանունը նշվել է 1-ինը, 18 անգամՙ 2-րդը, 9 անգամՙ 3-րդը: «Միկայի» հարձակվողն ընդհանուր առմամբ վաստակել է 118 միավոր: Իր թիմակցից 23 միավորով է հետ մնացել լավագույն եռյակը եզրափակած, «Միկայի» եւ ազգային հավաքականի կիսապաշտպան Դավիթ Գրիգորյանը: Հարցաթերթիկներում նրա ազգանունը 5 անգամ նշվել է 1-ինը, 19 անգամՙ 2-րդ, 13 անգամՙ 3-րդը:

Չորրորդ եւ հինգերորդ տեղերը 40-ական միավորով բաժանել են «Փյունիկի» հարձակվող եւ առաջնության լավագույն ռմբարկուներից մեկըՙ Գալուստ Պետրոսյանը, եւ դարպասապահ Ապուլա Բետեն: Նրանց հաջորդում են «Փյունիկի» պաշտպան Ալեքսանդր Թադեւոսյանըՙ 19 միավոր, Նշան Էրզրումյանը («Կիլիկիա»)ՙ 9, Կառլ Լոմբեն («Փյունիկ»)ՙ 7, Աղվան Մկրտչյանը («Փյունիկ»), Սամվել Մելքոնյանը («Բանանց»), Հովհաննես Թահմազյանը, Կարեն Նավոյանը («Արարատ»)ՙ 5-ական, Արարատ Առաքելյանը («Բանանց»)ՙ 4, Արարատ Հարությունյանը («Բանանց», «Շիրակ»), Մամադու Դիավարան, Կարեն Ալեքսանյանը (երկուսն էլՙ «Փյունիկ»)ՙ 3-ական, Վարդան Հովհաննիսյանը («Միկա»), Ռաֆայել Նազարյանը («Փյունիկ»), Արտյոմ Եվլանովը («Բանանց»)ՙ 2-ական, Կարեն Սիմոնյանը, Հովհաննես Դեմիրճյանը (երկուսն էլՙ «Բանանց»), Գոռ Միրզախանյանը («Կոտայք»), Վահե Թադեւոսյանը, Նենադ Ռադաջան (երկուսն էլՙ «Արարատ»), Լեւոն Փաչաջյանը («Փյունիկ»)ՙ 1-ական:

17-ամյա Էդգար Մանուչարյանը իրեն հիանալի դրսեւորեց ընթացիկ մրցաշրջանումՙ արդյունավետ խաղով աչքի ընկնելով թե՛ պատանեկան հավաքականներում, թե՛ «Փյունիկում»: Նա 21 գնդակով Գալուստ Պետրոսյանի հետ ճանաչվեց առաջնության լավագույն ռմբարկու: Այս տարի Էդգարը իր նորամուտը նշեց նաեւ ազգային հավաքականում:

Մրցաշրջանն, անշուշտ, հաջող էր փորձառու Արմեն Շահգելդյանի համար: 31-ամյա ֆուտբոլիստը 1-ամյա ընդմիջումից հետո կրկին հանդես գալով Հայաստանի առաջնությունում, իրեն լավագույն կողմերով դրսեւորեց եւ կրկին հրավիրվեց ազգային հավաքականՙ բացելով հավաքականի գոլերի թիվն ընտրական մրցաշարում: «Միկայում» էլ Արմենը աչքի ընկավ արդյունավետ եւ գրագետ խաղովՙ դառնալով 12 գոլի հեղինակ:

«Միկայի» երիտասարդ կիսապաշտպան Դավիթ Գրիգորյանի համար անկասկած ընթացիկ մրցաշրջանը նրա ֆուտբոլային կենսագրությունում լավագույնն է: Դավիթն էլ իր փորձառու թիմակցի նման «Միկայում» աչքի ընկավ արդյունավետ խաղովՙ իր օգտին գրանցելով 11 գնդակ: Բնական է, որ նրա խաղը գրավեց հավաքականի մարզիչների ուշադրությունը եւ Գրիգորյանը բավական հաջող ելույթներ ունեցավ նաեւ ազգային հավաքականում:

«Ազգի» մարզական բաժնի կողմից շնորհավորում ենք մրցաշրջան-2004-ի դափնեկիրներին, որոնց պարգեւատրման հանդիսավոր արարողությունը տեղի կունենա վաղը: Հետաքրքրական է, որ լրատվամիջոցներից լավագույն եռյակը ճշտությամբ գուշակել են «Ազգի» եւ «Ֆուտբոլ ռեւյուի» թղթակիցները: Գլխավոր մարզիչներից ճիշտ է գուշակել «Արարատի» մարզիչ Սեւադա Արզումանյանը, իսկ մրցավարներիցՙ Սուրեն Կարապետյանը:

Հայաստանի լավագույն ֆուտբոլիստները