Այսօր Համահայկական երիտասարդական հիմնադրամի «Հայկյան» մրցանակաբաշխությանը մասնակցելու հայտերի ընդունման վերջին օրն է: Մրցանակաբաշխության հիմնական նպատակն է խրախուսել երիտասարդական ոլորտում առավելագույն ներդրում ունեցող երիտասարդների, հասարակական կազմակերպությունների եւ ուսանողական կառույցների իրականացրած ծրագրերը: Լավագույն ուսանողական ինքնակառավարման մարմին, ուսանողական ծրագիր, ուսանողական պարբերական, մարզային երիտասարդական ծրագիր, երիտասարդության խնդիրները լուսաբանած լավագույն լրագրող, լրատվամիջոց, երիտասարդությանը լավագույնս աջակցած պետական գործիչ եւ այլ մրցակարգերում կխրախուսվեն տարվա ընթացքում աչքի ընկած կառույցներն ու անհատները:
Համահայկական երիտասարդական հիմնադրամի լրատվության պատասխանատու Աստղիկ Ավետիսյանն ընդհանուր առմամբ գոհ է դիմողների քանակից: «Վերջին օրը, կարծում եմ, ակտիվությունն ավելի կմեծանա, ասաց նա: Ասում ենՙ վերջին օրերին դիմելը լավ նշան է»: Նա նշեց, որ հատկապես ակտիվ են Վայոց ձորի, Սյունիքի երիտասարդները: Հիմնադրամը տարվա ընթացքում երիտասարդական դաշտի մոնիտորինգ է իրականացրել: Ըստ Ավետիսյանի, մոնիտորինգը ցույց է տալիս, որ, օրինակՙ «Նիկոլ Աղբալյան» ուսանողական միությունը, «Ուսանողի ձայն» պարբերականը դիմելու դեպքում լավագույններից լինելու հավակնություն կունենային:
Այս տարի միջոցառումը տեղի կունենա հունվարի վերջին: Ընդունող հանձնաժողովի կազմում են երիտասարդական պետական, հասարակական կառույցների, ուսանողական ինքնակառավարման մարմինների ներկայացուցիչներ:
ԹԱՄԱՐ ՄԻՆԱՍՅԱՆ