Ֆուտբոլի Հայաստանի ազգային հավաքականի հարձակվող Անդրեյ Մովսիսյանը, որ «Մոսկվա» ակումբի կողմից տրանսֆերի էր հանվել, գոլով նշանավորեց նորամուտը Վլադիկավկազի «Ալանիայի» կազմում: Մովսիսյանը փորձաշրջանի է մեկնել Թուրքիայի Բելեկ քաղաքում ուսումնամարզական հավաք անցկացնող «Ալանիա»: Նա մասնակցել է արգենտինական «Արգենտինիոս Խունիորս» թիմի հետ ընկերական հանդիպմանը: Այդ խաղի 51-րդ րոպեին Մովսիսյանը բացել է հաշիվըՙ նպաստելով թիմի վերջնական հաղթանակին (2-1): Մովսիսյանից բացի, ամբողջ հանդիպմանը մասնակցել է նաեւ ՀՀ ազգային հավաքականի մեկ այլ խաղացողՙ Ալբերտ Սարգսյանը, որի հետ պայմանագրի ժամկետը լրանում է հունվարին:
Հիշեցնենք, որ մինչ Մովսիսյանը, «Ալանիայում» փորձաշրջան էին անցել ՀՀ հավաքականի եւս երեք ֆուտբոլիստներՙ Ալեքսանդր Թադեւոսյանը, Աղվան Մկրտչյանն ու Ռոմիկ Խաչատրյանը: Թադեւոսյանն ու Խաչատրյանը նույնիսկ գոլի հեղինակ էին դարձել, սակայն թիմի մարզիչները նրանց խաղը չէին հավանել: