Հանրապետության բրոնզե մրցանակակիր Երեւանի «Բանանցն» ուսումնամարզական հավաքի է մեկնել Եվպատորիա, որտեղ մինչեւ փետրվարի 22-ը մարզումներին զուգահեռ նաեւ ընկերական հանդիպումներ կանցկացնի: Կարճ ժամանակով վերադառնալով Երեւան, «Բանանցը» կրկին կմեկնի հավաքիՙ այս անգամ արդեն Անթալիա:
Իսկ առաջնության արծաթե մեդալակիր «Միկան» վաղը կմեկնի Աշգաբադՙ մասնակցելու Թուրքմենբաշիի գավաթի խաղարկությանը: Մրցաշարին կմասնակցի 6 թիմ, որոնք նախնական փուլում բաժանվել են 2 խմբի: Փետրվարի 14-ին «Միկան» խմբային մրցաշարի մեկնարկային խաղում ուժերը կչափի ուկրաինական Պոլտավա քաղաքի «Վորսկլա» թիմի հետ, իսկ երկու օր անց մեր թիմի մրցակիցը կլինի Ուզբեկստանի Նամանգան քաղաքի «Նովբախորը»: Մյուս խմբում ընդգրկված են Թուրքմենստանի չեմպիոն «Նեբիտչին», Ղազախստանի «Օկժետպեսը» եւ Տաջիկստանի «Ավիատորը»:
Խմբերում առաջին տեղեր գրաված թիմերը փետրվարի 19-ին կվիճարկեն Թուրքմենբաշիի գավաթը: 2-րդ տեղերը զբաղեցրած ակումբները մեկ օր առաջ կվիճարկեն մրցանակային 3-րդ տեղը:
ԱՇՈՏ ՀԱՅՐԱՊԵՏՅԱՆ