Արտախորհրդարանական 25 կուսակցությունների մասնակցությամբ երեկ արդեն երրորդ անգամ քննարկվեց ընտրական օրենսգրքում նշյալ կուսակցությունների կողմից առաջարկված փոփոխությունների ու լրացումների հարցը: Արտախորհրդարանական ուժերը գտնում են, որ գարնանային նստաշրջանում ընտրական օրենսգրքի փոփոխությունների քննարկումները բավարար չէին եւ չեն կարող արտահայտել հասարակության լայն խմբերի տեսակետներն ու շահերը, քանի որ դրանց մասնակցում է վերոնշյալ խմբերի 10 տոկոսից ոչ ավելին:
«Հասարակական երկխոսությունների, նախաձեռնությունների կենտրոն», «Համայնք եւ իրավունք» ՀԿ-ները գտնում են, որ անհրաժեշտ է խորհրդարանական քննարկումներին զուգահեռ ծավալել լուրջ քննարկում արտախորհրդարանական ուժերի մասնակցությամբ:
Մասնակիցներն ակնկալում են քննարկումների արդյունքում ստեղծել հիմնավոր փաստաթուղթ, որը կներկայացվի ԱԺ` օրենքի վերջնական տարբերակի երկրորդ ընթերցման ժամանակ հաշվի առնելու ակնկալիքով: Իսկ ստեղծված փաստաթուղթն ԱԺ-ի ուշադրությանն արժանացնելու համար, «Համայնք եւ իրավունք» ՀԿ-ի նախագահ Սամվել Մկրտչյանի խոսքերով, իրենք կկիրառեն լոբբիինգի բոլոր ձեւերը, սակայն մինչ այդ պետք է փաստաթուղթն ունենալ:
Թե ինչ կստացվի վերջում եւ ինչ հանրագումարի կգան արտախորհրդարանական ուժերի մասնակիցները, դժվար է ասել, բայց երեկվա դրությամբ որոշ մասնակիցներ անգամ դեմ էին մեկ միասնական փաստաթուղթ ստորագրելուն: ԱԻՄ կուսակցության նախագահության անդամ Արկադի Վարդանյանն, օրինակ, առաջարկում է ստորագրվելիք փաստաթղթի մեջ նշել, թե որ առաջարկի հեղինակը ով է, քանի որ լինում են խիստ ծայրահեղ առաջարկներ: Նախագահության անդամը նշեց, որ ոմանք առաջարկում են ընտրություններն անցկացնել համամասնական ընտրակարգով, իսկ ոմանք էլ առաջարկում են մեծամասնականի տեղերն ավելացնել:
ԳՈՀԱՐ ԳԵՎՈՐԳՅԱՆ