Ֆուտբոլի Հայաստանի բարձրագույն խմբի առաջնության 5-րդ տուրից հետո մրցաշարային աղյուսակում շերտավորում է ստեղծվել: Արդեն ի հայտ են եկել ակնհայտ առաջատարները, ինչպես նաեւ հետնապահները: Այս առումով կարեւոր նշանակություն ուներ երեկ Աբովյանում կայացած «Դինամո-Զենիթ»-«Լեռնային Արցախ» հանդիպումը: Մրցակիցները երեք անընդմեջ պարտություն էին կրել, ուստի, ինչպես ասում են, նահանջելու տեղ չունեին: Հանդիպումը դրամատիկ ելք ունեցավ: Խաղի 49-րդ րոպեին «Լեռնային Արցախը», շնորհիվ Արարատ Ղազարյանի եւ Տիգրան Եսայանի խփած գոլերի, խաղը շահում էր 2-0 հաշվով: Բայց հյուրերը ոչ միայն չպահպանեցին հաղթական հաշիվը, այլեւ ի վերջո խաղադաշտը թողեցին պարտված: Ընդամենը 6 րոպեում (64-70-րդ) դինամոյականներ Ստեփան Հակոբյանը, Ալբերտ Ներսիսյանը, Ռաֆայել Մկրտչյանը կշեռքի նժարը թեքեցին իրենց կողմըՙ ապահովելով թիմի հաղթանակը: Այսպիսով, «Լեռնային Արցախը» 4-րդ անընդմեջ պարտությունը կրեց, իսկ դինամոյականներն անդրանիկ հաղթանակը տոնեցինՙ խույս տալով վերջին տեղից:
ՀՀ նորընծա գավաթակիր «Միկան» սեփական հարկի տակ ոչ-ոքի խաղաց «Էսթեղլալ-Կոտայքի» հետ: Այդ խաղում առաջինը հաջողության հասան կոտայքցիներըՙ շնորհիվ Արարատ Հարությունյանի 51-րդ րոպեին խփած գոլի: 14 րոպե անց Արտյոմ Ադամյանը վերականգնեց հավասարակշռությունը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 5 | 4 | 1 | 0 | 10-2 | 13 |
| 2. Բանանց | 4 | 4 | 0 | 0 | 6-2 | 12 |
| 3. Կիլիկիա | 5 | 2 | 1 | 2 | 9-6 | 7 |
| 4. Միկա | 4 | 2 | 1 | 1 | 4-3 | 7 |
| 5. Էսթ.-Կոտայք | 5 | 1 | 3 | 1 | 5-5 | 6 |
| 6. Դին.-Զենիթ | 4 | 1 | 0 | 3 | 4-6 | 3 |
| 7. Լ. Արցախ | 5 | 1 | 0 | 4 | 8-10 | 3 |
| 8. Շիրակ | 4 | 1 | 0 | 3 | 5-9 | 3 |
| 9. Լեռնագործ | 4 | 1 | 0 | 3 | 1-9 | 3 |
Ռմբարկուները
| Էդգար Մանուչարյան | «Փյունիկ» | 3 |
| Կարեն Խաչատրյան | «Շիրակ» | 3 |
| Սարգիս Մովսիսյան | «Կիլիկիա» | 3 |
| Նշան Էրզրումյան | «Կիլիկիա» | 3 |