Տիգրան Պետրոսյանի անվան շախմատիստի տանն իրենց մրցավեճն են սկսել շախմատի Հայաստանի կանանց բարձրագույն խմբի առաջնության մասնակիցները: Գերազանց են մեկնարկել միջազգային գրոսմայստեր Լիլիթ Մկրտչյանն ու միջազգային վարպետ Նարինե Գասպարյանը, որոնք անցկացրած բոլոր երեք պարտիաներն էլ ավարտել են իրենց օգտին: Լիլիթ Մկրտչյանը հաջորդաբար հաղթել է Նելլի Աղինյանին, Լիլիթ Գալոյանին եւ Անի Ավանեսյանին: Գասպարյանն առավելության է հասել Աննա Հայրապետյանի, Լուսինե Ալավերդյանի եւ Անի Ավանեսյանի նկատմամբ: Չորրորդ տուրում առաջատարները մրցելու են միմյանց հետ:
Հաջող են մեկնարկել նաեւ Էլինա Դանիելյանն ու Նունե Դարբինյանըՙ վաստակելով 2,5-ական միավոր: Իսկ ահա միջազգային վարպետ Նելլի Աղինյանը, ինչպես նաեւ Անի Ավանեսյանը 3 անընդմեջ պարտություն են կրել: