Հունիսի 17-ին ՀՀ ազգային անվտանգության ծառայության մարմինները Հայաստանից 17-20-րդ դդ. հրապարակված գրքերի մեծ խմբաքանակ արտահանելու համար «Զվարթնոց» օդանավակայանում ձերբակալել էին Թուրքիայի քաղաքացի Եքթա Թուրքյըլմազին: Նույն օրը թուրքական հանրային հեռուստատեսությունն արձագանքել էր ձերբակալման փաստին:
Հունիսի 21-ին էլ արձագանքում է «Միլիեթը»ՙ մասնավորապես գրելով. «Թուրքիան նախաձեռնություն է ցուցաբերում Հայաստանի մայրաքաղաք Երեւանում ձերբակալված թուրք հետազոտող Եքթա Թուրքյըլմազի ազատ արձակման համար: Երկու երկրների դիվանագիտական հարաբերությունների բացակայության պատճառով Վրաստանում Թուրքիայի դեսպան Էրթան Թեզգյոզն ազատ արձակելու պահանջը փոխանցեց նույն երկրում Հայաստանի դեսպանին: Արտգործնախարարության աղբյուրները հաստատեցին, որ Թուրքյըլմազի գործով Թեզգյոզը պաշտոնապես դիմել է Հայաստանի իշխանություններին: Թուրքյըլմազն առաջին թուրք հետազոտողն է, որը Հայաստանի արխիվներում աշխատելու թույլտվություն է ստացել: Նա Երեւանից «հնաոճ գրքեր արտահանելու» ամբաստանությամբ ձերբակալվեց, սակայն նրա ճակատագրի առնչությամբ որեւէ հայտարարություն չի արվել»:
Հ. Չ.