Երկու փուլով անցկացվող ֆուտբոլի Հայաստանի բարձրագույն խմբի առաջնությունում արդեն հայտնի են այն հինգ թիմերը, որոնք ապահովել են իրենց տեղը լավագույն վեցյակում, ինչը նրանց հնարավորություն կընձեռի շարունակելու պայքարը մրցանակային տեղերի համար: Այդ թիմերի մրցավեճում խաղարկվում են այսպես կոչված «ոսկե» միավորներ: Նման հանդիպումների շարքին էր դասվում նաեւ «Բանանց»-«Կիլիկիա» մրցավեճը: «Բանանցը» վերջին շրջանում կորցրել է մարտունակությունը, ինչը ՈՒԵՖԱ-ի գավաթի խաղարկության մեկնարկին չի կարող չանհանգստացնել: Ակումբի ղեկավարությունը հերթական անգամ մարզչական փոփոխությունների է դիմել: Թիմի գլխավոր մարզիչ Հովհաննես Զանազանյանն այսուհետ զբաղեցնում է ակումբի փոխնախագահի պաշտոնը, իսկ գլխավոր մարզչի պարտականույթունները դրվել են Աշոտ Բարսեղյանի վրա: Ի տարբերություն «Բանանցի», «Կիլիկիան» վերջին հանդիպումները վերելքով է անցկացնումՙ աչքի ընկնելով արդյունավետ խաղով: Իրենց տարերքի մեջ են մտել հատկապես Էրզրումյան եղբայրները: Թվում էր, թե «Բանանցի» հետ խաղում էլ «Կիլիկիան» հաջող հանդես կգա: Սակայն այս անգամ դա «Կիլիկիային» չհաջողվեց: Արդեն 19-րդ րոպեին Տիգրան Ղարաբաղցյանը, որ առաջին խմբի լավագույն ռմբարկուն է, բացեց հաշիվը: 50-րդ րոպեին Արամ Հակոբյանը կրկնապատկեց հաշիվըՙ խփելով պաշտոնական մրցումներում իր 95-րդ գնդակը: 5 րոպե անց նա կարող էր նաեւ 3-րդ գոլը խփել, երբ մեն-մենակ դուրս եկավ «Կիլիկիայի» դարպասապահ Արմեն Կիրակոսյանի դեմ: Վերջինս ընդառաջ դուրս գալով հարձակվողին, տուգանային հրապարակից դուրս վայր գցեց նրան, որի համար հեռացվեց դաշտից: Մնալով 10 հոգով, «Կիլիկիան» այդպես էլ չկարողացավ գտնել մրցակցի դարպասի բանալին:
Վերջին հանդիպումներում արդյունավետ խաղով աչքի է ընկնում նաեւ «Էսթեղլալ-Կոտայք»: Այս թիմում էլ օրերս մարզչական կազմում փոփոխություններ են տեղի ունեցել: Իրանՙ մարզչական աշխատանքի են մեկնել ավագ մարզիչ Գեւորգ Քամալյանն ու մարզչական խորհրդի նախագահ Վարուժան Սուքիասյանը, իսկ թիմի ղեկը ստանձնել է «Վաղարշապատի» այժմ արդեն նախկին մարզիչ Արսեն Չիլինգարյանը: Երեկ «Էսթեղլալ-Կոտայքը» հյուրընկալել էր «Միկային»: Հանդիպումն անցավ «Միկայի» ֆուտբոլիստների զգալի առավելությամբ: Հատկապես երկրորդ խաղակեսում հյուրերը մի քանի անգամ կարող էին գրավել մրցակցի դարպասը: Սակայն գոլային պահերը չկարողացան իրացնել Արտյոմ Ադամյանը, Արմեն Շահգելդյանը, Արտաշես Ադամյանը: Գոլային ամենառեալ պահը ստեղծվեց 78-րդ րոպեին, երբ Մելոյանը նուրբ փոխանցումով հարվածի դուրս բերեց Շեւչենկոյին, բայց վերջինս մոտ տարածությունից վրիպեց: Այդպես էլ դարպասները մնացին անառիկ:
Գյումրիում «Շիրակը» հյուրընկալել էր երկրի չեմպիոն «Փյունիկին»: Այդ խաղում էլ գոլ չգրանցվեց: Այսօր «Հրազդանում» կայանալիք «Լեռնային Արցախ»-«Դինամո-Զենիթ» հանդիպումով կավարտվի առաջնության 11-րդ տուրը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 9 | 7 | 2 | 0 | 19-5 | 23 |
| 2. Բանանց | 8 | 6 | 1 | 1 | 12-8 | 19 |
| 3. Միկա | 9 | 5 | 3 | 1 | 13-6 | 18 |
| 4. Էսթ.-Կոտայք | 10 | 4 | 5 | 1 | 16-8 | 17 |
| 5. Կիլիկիա | 9 | 3 | 3 | 3 | 15-12 | 12 |
| 6. Շիրակ | 10 | 2 | 2 | 6 | 12-22 | 8 |
| 7. Դին.-Զենիթ | 9 | 1 | 3 | 5 | 8-13 | 6 |
| 8. Լ. Արցախ | 9 | 2 | 0 | 7 | 13-20 | 6 |
| 9. Լեռնագործ | 9 | 1 | 1 | 7 | 3-17 | 4 |
Ռմբարկուները
| Նշան Էրզրումյան | «Կիլիկիա» | 6 |
| Էդգար Մանուչարյան | «Փյունիկ» | 5 |
| Արտյոմ Ադամյան | «Միկա» | 5 |
| Սամվել Պետրոսյան | «Է.-Կոտայք» | 5 |